«Таза Қазақстан» экологиялық бағдарламасы аясында Жетісу облысындағы Панфилов ауданында «Жаркент мешіті» сәулет-көркемөнер мұражайының маңайы абаттандырылды. Сонымен қатар туристік нысан айналасындағы көшелерді жаңғырту жұмыстары да жүргізілуде, – деп хабарлайды Жетісу облысы әкімінің баспасөз қызметі.
Аудан әкімдігінің мәліметінше, Жаркент қаласында абаттандыру бағытында 3 жоба іске асырылып жатыр.
– Біз ең алдымен «Жаркент мешіті» туристік нысанының маңын көркейттік. Бұл – Юлдашев көшесінің Масанчи және Гапаров көшелері аралығындағы бөлігі. Онда брусчатка төселді, орындықтар, қоқыс жәшіктері орнатылды, жарықтандыру жүргізілді, 30-ға жуық ағаш, гүлзар мен көгал егілді. Осындай абаттандыру жұмыстары Головацкий көшесінің Жібек жолы-Масанчи аралығындағы бөлігінде де басталды. Бұған дейін 2023 жылы қоғамдық тыңдалым кезінде тұрғындар «Арбат» типіндегі серуен алаңын жасау туралы ұсыныс айтқан болатын. Соған сәйкес қаланың Бас жоспарына өзгерістер енгізіп, жоспар әзірледік. Қазір «Арбаттың» құрылысы басталды. Шатырлар, орындықтар орнатылып, шағын архитектуралық формалар қойылып, көпшілік серуендейтін әдемі демалыс орнына айналады, – деді Панфилов ауданы әкімінің орынбасары Дидар Ешенов.
Оның айтуынша, Жібек жолы даңғылының шығыс бөлігі де абаттандырылады.
Аталған үш жоба аясында 500-дей ағаш егіліп, автоматты суару желісі орнатылады. Көшелердің жалпы көлемі 20,7 мың шаршы метр болатын учаскесі абаттандырылады.
Жаркент қаласының тұрғындары мұндай бастамалардың қолға алғанын қуана қолдайтынын білдірді.
– Жабайы сауда мен такси жүргізушілерінің ретсіз қойылған көліктерінің кесірінен Жаркент қаласындағы орталық, атап айтқанда базар маңындағы көшелерден жаяу адам өте алмай қиналатынбыз. Ұзақ жылдар бойы шешілмей келе жатқан бұл мәселе биыл қолға алынып, орталық көшелер абаттандырылып жатыр. Өзім жұмысқа барар жолда күнделікті осы көшелерден өтемін, көргенге көз сүйінеді. Тап-тұйнақтай, жинақы, жаңа. Кешкілік бала-шағамен серуендеуге қолайлы әрі қауіпсіз демалыс орны пайда болғанына қуаныштымыз, – дейді қала тұрғыны Зульфия Шамиева.
Жетісу облысы әкімінің баспасөз қызметі.
Фотограф: Жұмабай Мұсабеков
Ақпарат көзі : https://www.gov.kz/memleket/entities/zhetysu-panfilov/press/news/details/1056793?lang=kk
Жауап қалдыру