Сауран ауданында «Білім келешегі: адал азамат, кәсіби маман» тақырыбында педагогтердің дәстүрлі тамыз кеңесі өтті. Жиынға аудан әкімі Мақсат Таңғатаров, Түркістан облысы білім басқармасы басшысының орынбасары Айгүл Қасымбекова, ардагер ұстаздар мен білім беру саласының ардақты мамандары қатысты.
Кеңесте өткен оқу жылының қорытындылары сараланып, жаңа 2025–2026 оқу жылындағы міндеттер мен мақсаттар айқындалды. Жиын барысында аудан әкімі Мақсат Таңғатаров ұстаздарды жаңа оқу жылымен құттықтап, білім саласын дамытудағы жоспарларымен бөлісті.
Кеңес аясында бірқатар педагогтер мен сала қызметкерлері еңбектері үшін марапатталды. Ұстаздарға аудан, облыс әкімдерінің және облыстық мәслихаттың алғыс хаттары мен грамоталары табысталды. Сонымен қатар, Мемлекет басшысы Қасым-Жомарт Тоқаевтың 2025 жылды «Жұмысшы мамандықтар жылы» деп жариялауына орай білім ұяларындағы техникалық қызметкерлер де назардан тыс қалмай, марапат иеленді.
Жиында Түркістан облысы білім басқармасы басшысының орынбасары Айгүл Қасымбекова «2025–2026 оқу жылы: Жаңа мүмкіндіктер мен жаңа міндеттер» тақырыбында баяндама жасаса, мектеп директорлары мен тәжірибелі ұстаздар да ой-пікірлерін ортаға салды.
Кеңес соңында аудандық мәслихат өкілдері мен білім беру ұйымдарының басшылары педагогтерді құттықтап, жаңа оқу жылында шығармашылық табыс тіледі. Аудандық тамыз кеңесі ұстаздар қауымының жаңа бастамаларға тың серпін алып, келешек ұрпақ тәрбиесі жолында біріге еңбек етуге үндеу жасай отырып, естелік суретке түсу рәсімімен қорытындыланды.
Сауран ауданы әкімдігінің баспасөз қызметі
Ақпарат көзі : https://www.gov.kz/memleket/entities/sauran-turkestan/press/news/details/1057440?lang=kk
Жауап қалдыру