Кентау қаласында ерекше әдіспен дайындалатын «Ayran» сүт өнімі өндіріле бастады. Жобаның авторы – жас кәсіпкер Жеңісхан Әлмаханов. Ол шетелде жинаған тәжірибесін елге оралып, кәсіпкерлікке бағыттауды жөн санаған.
Іске қосылғанына небәрі екі ай болса да, өнімге деген сұраныс күннен-күнге артып келеді. Қазіргі таңда тәулігіне 200-300 банка «Ayran» сусыны шығарылып, Кентау мен Түркістан қалаларындағы дүкендерге жеткізілуде. Сонымен қатар, қажетті шикізаттар Алматы және Түркістан қалаларынан арнайы алдырылып отыр.
«Ayran» өнімі үш түрлі үлгіде дайындалады. Кәсіпкер алдағы уақытта арнайы цех ашып, сүт өнімдерімен қатар табиғи тәтті сусындар өндіруді жоспарлап отыр. Қызылорда қаласынан да тапсырыстар қабылданып, фаст-фуд бағытындағы дәмханалардан сұраныс арта түскен.
«Біздің басты мақсатымыз – табиғи өнім арқылы халық денсаулығын нығайтып қана қоймай, ұлттық құндылықты дәріптеу. «Ayran» – ата-баба асын заманауи үлгіде қайта жаңғыртып, болашақ ұрпаққа жеткізуді көздейді», – дейді кәсіпкер Жеңісхан Есмаханұлы.
«Ayran» бренді өзінің табиғилығы мен дәстүрлі әдіспен дайындалуымен ерекшеленеді. Шипалы сусын ас қорытуға жеңіл, ыстық күндері шөлді қандырып, қыста ағзаны қуаттандырады.
Ақпарат көзі : https://www.gov.kz/memleket/entities/turkestan-kentau-kalasy/press/news/details/1058155?lang=kk
Жауап қалдыру