Мектепке дайындық әрдайым толқумен және маңызды сатып алулармен байланысты. Солардың ішінде балаға күн сайын серік болатын ең басты заттардың бірі – мектеп рюкзагы. Алғашқыда бастысы түсі мен сәнді дизайны сияқты көрінуі мүмкін, өйткені ол балаға ұнауы керек. Бірақ шын мәнінде рюкзактың сапасы мен қолайлылығы ең алдымен бала денсаулығына әсер етеді. Дұрыс таңдалмаған немесе шамадан тыс ауыр сөмке омыртқаға зиян келтіріп, тез шаршауға, бас ауруына және тіпті мүсіннің бұзылуына әкелуі мүмкін.
Осындай салдарлардың алдын алу үшін рюкзак таңдағанда бірнеше маңызды жайттарға назар аудару қажет. Ең алдымен, бұйымда анық белгі болуы тиіс: «мектепке арналған» деген белгісі және қай жас тобына сәйкес келетіні көрсетілуі керек.
Бұл оның қауіпсіздік талаптарына сай екенін білдіреді, ал қажет болған жағдайда сатушы сапа сертификатын ұсынуға міндетті.
Рюкзактың өз салмағы да аса маңызды. Бастауыш сынып оқушылары үшін ол 700 грамнан аспауы тиіс, ал орта және жоғары сыныптар үшін – 1 килограмнан артық болмауы керек. Өйткені сөмкеге қоса бала күн сайын оқулықтар мен дәптерлерді алып жүреді, ал олардың жалпы салмағы рұқсат етілген нормадан аспауы қажет. Мысалы, бірінші сынып оқушысы үшін барлығы 2,2 кг жеткілікті болса, жоғары сынып оқушылары үшін ең көп дегенде 5 кг болуы тиіс.
Арқа бөлігі мен иықбауларына да ерекше назар аудару қажет. Рюкзак қатты қалыпта болуы, арқаға тығыз жанасып, салмақты біркелкі бөлуі тиіс. Бастауыш сыныптағы балаларға арнайы ортопедиялық арқасы бар үлгілерді таңдаған дұрыс, олар мүсіннің дұрыс қалыптасуына көмектеседі. Иықбаулары кең, берік, реттелетін және жұмсақ, ауа өткізетін төсемі бар болғаны жөн, ол иықты қажамайды.
Жолдағы қауіпсіздікті де ұмытпаған жөн. Рюкзакта міндетті түрде жарық қайтаратын элементтер болуы қажет – олар қараңғы уақытта баланы жүргізушілерге айқын көрсетеді. Бұл әсіресе қыс мезгілінде маңызды, балалар мектепке таңертең ерте немесе кешкі уақытта қайтқанда жолда қауіпсіздік береді.
Соңында, материалға назар аударыңыз. Жақсы рюкзак жеңіл, мықты, су өткізбейтін қабаты бар әрі тазалауға ыңғайлы болуы керек. Бұл оны ұзақ уақыт қолдануға және күнделікті жайлылыққа мүмкіндік береді.
Құрметті ата-аналар, рюкзак таңдау – жай ғана сатып алу емес, ол ең алдымен балаңыздың денсаулығына деген қамқорлық.
Ақпарат көзі : https://www.gov.kz/memleket/entities/departament-kkbtu-akmolinsk/press/news/details/1058667?lang=kk
Жауап қалдыру