Көлік жуу орындары мен техникалық қызмет көрсету станциялары бүгінде біздің күнделікті өміріміздің ажырамас бөлігіне айналды. Автокөлік иелері олардың қызметін күн сайын пайдаланады, алайда мұндай нысандар жұмысы дұрыс ұйымдастырылмаған жағдайда адамдардың денсаулығына және қоршаған ортаға қауіп төндіруі мүмкін екенін көпшілік ойлай бермейді. Осындай жағдайға жол бермеу үшін санитарлық заңнама олардың жұмыс істеу тәртібі мен мазмұнына нақты талаптар қояды.
Алдымен әңгіме кәріз жүйесі жайында. Жуу орындары мен СТО-ларда пайда болған шайынды сулар жерге немесе жақын маңдағы өзен-көлге төгілмеуі тиіс. Өйткені сумен бірге май қалдықтары, бензин, қышқылдар және өзге де зиянды заттар кетеді. Сондықтан мұндай нысандардың аумағында міндетті түрде тазалау қондырғылары бар нөсерлік кәріз жүйесі орнатылуы қажет. Тазартылмаған шайынды суларды ашық су айдындарына ағызуға қатаң тыйым салынады.
Қалдықтармен жұмыс істеу мәселесі де маңызды. Мұнай өнімдерінің қалдықтары арнайы ыдыстарға жиналып, улы қалдықтар тек мамандандырылған полигондарға шығарылады. Мұның барлығы ластаушы заттардың топыраққа түспеуі және табиғатты уламауы үшін жасалады.
Ғимараттардың өзіне де талаптар қойылады. Өндірістік аймақтарда ауа кіргізіп-шығаратын желдеткіш жүйелері орнатылып, зиянды заттар түзілетін жерлерде қосымша сорғыштар қарастырылуы тиіс. Әсіресе сырлау және аккумуляторлық бөлімдер қатаң бақыланады: олардың желдету жүйелері басқа бөлмелерден толық оқшаулануы керек. Көлікті сырлау тек жабық камераларда жүргізіліп, ауа сыртқа шығарылар алдында міндетті түрде тазартылады.
Сонымен қатар әр жұмыс бағыты бөлек бөлмеде орындалуы тиіс: дәнекерлеу, диагностика, қозғалтқышты жөндеу, аккумуляторды зарядтау немесе сырлау жұмыстары араластырылмайды. Бұл тәртіп тек қызметкерлердің қауіпсіздігі үшін ғана емес, зиянды заттардың таралуының алдын алу үшін де қажет.
Заң бойынша көлік жуу орындары мен СТО иелері санитариялық-эпидемиологиялық бақылау органдарына өз қызметінің басталғаны немесе тоқтатылғаны жөнінде хабарлауға, сондай-ақ жүйелі түрде өзін-өзі тексеруге міндетті. Мұндай бақылаудың нәтижелері кемінде жарты жылда бір рет ұсынылуы керек.
Бұл талаптар қатаң болып көрінуі мүмкін, бірақ олар қажет. Өйткені сөз тек көліктің тазалығы туралы ғана емес, күн сайын пайдаланатын ауа, су және жердің тазалығы туралы болып отыр. Санитариялық ережелерді сақтау арқылы кәсіпорындар өз клиенттерінің қауіпсіздігін, қызметкерлерінің денсаулығын және қоршаған ортаның сақталуын қамтамасыз етеді.
Ақпарат көзі : https://www.gov.kz/memleket/entities/departament-kkbtu-akmolinsk/press/news/details/1058663?lang=kk
Жауап қалдыру