Бетпердесіз және никабсыз: ШҚО полицейлері қоғамдық орындарда жаңа ережелер туралы түсіндіруде
Шығыс Қазақстан облысының полицейлері қоғамдық орындарда бетті бүркемелейтін киімді киюге тыйым салатын жаңа заң нормалары туралы халық арасында түсіндіру жұмыстарын жалғастыруда. Аталған заң 2025 жылдың 12 шілдесінде күшіне енген.
Профилактикалық іс-шаралар аясында учаскелік инспекторлар Өскемен қаласының ірі сауда-ойын-сауық орталықтарында жүздеген тұрғынға түсіндіру әңгімелерін өткізді. Басты мақсат – азаматтарды қоғамдық қауіпсіздікті қамтамасыз етуге және адамның жеке бас деректерін оңай анықтауға бағытталған жаңа талаптармен таныстыру.
Полицейлердің айтуынша, тыйым салынған киімге бетті толық жауып тұратын никаб немесе бетперде сынды жабдықтар жатады. Ал хиджаб, химар мен шейла секілді дәстүрлі бас киімдер, егер бет ашық болса, шектеу қойылмайды.
Медициналық көрсеткіштерге, ауа райы жағдайына, кәсіби міндеттерді орындауға, сондай-ақ мәдени және спорттық іс-шараларға қатысуға байланысты ерекшеліктерге жол беріледі.
Кездесулер барысында полицейлер киберқауіпсіздік ережелерін де еске салып, интернет-алаяқтықтың кең таралған тәсілдері туралы ескертті және тұрмыстық зорлық-зомбылық жағдайларында дер кезінде көмекке жүгінудің маңыздылығын атап өтті. Тұрғындарға төтенше жағдайда бірден 102 нөміріне қоңырау шалу қажеттігі ескертілді.
ШҚО ПД баспасөз қызметі
Ақпарат көзі : https://www.gov.kz/memleket/entities/mvd-vko/press/news/details/1058291?lang=kk
Жауап қалдыру