Мойынқұм аудандық әкімдігінде аудан әкімі Ермек Карентаевтың төрағалығымен құқық бұзушылық профилактикасы жөніндегі ведомствоаралық комиссияның кезекті отырысы өтті. Жиында қоғам тыныштығы мен азаматтардың қауіпсіздігін қамтамасыз етуге бағытталған бірқатар өзекті мәселелер қаралды. Күн тәртібіне енгізілген алты мәселе – қазіргі таңда аудан үшін маңызды және қоғам тарапынан жіті назарды қажет ететін бағыттар.
Алдымен Қазақстан Республикасының 2022-2026 жылдарға арналған сыбайлас жемқорлыққа қарсы саясаты аясында бекітілген «Әртүрлі нысаналы топтар деңгейінде декомпозицияланған ақпараттық жұмыс жүргізу жөніндегі іс-шаралар жоспарының» орындалу барысы қаралды. Бұл құжат қоғамда адалдық қағидаттарын орнықтыруға және жемқорлықтың алдын алуға бағытталған. Жиында жоспардың жүйелі түрде іске асуының маңыздылығы атап өтіліп, ақпараттық-түсіндіру жұмыстарын одан әрі жандандыру қажеттігі айтылды.
Посмотреть эту публикацию в Instagram
Екінші мәселе ретінде қауіпсіздікті қамтамасыз етуге бағытталған бейнебақылау жүйелерінің жай-күйі талқыланды. Қазіргі таңда аудан аумағында орнатылған бейнекамераларға техникалық сүйемелдеу жүргізу, сондай-ақ оларды аудандық полиция бөлімімен толыққанды интеграциялау мәселесі көтерілді. Бұл бағыттағы жұмыстар құқық бұзушылықтардың алдын алып, тәртіп сақшыларының жедел әрекет етуіне мүмкіндік бермек.
Кеңесте қаралған келесі мәселе – мал ұрлығы мен ветеринария саласындағы құқық бұзушылықтардың алдын алу. Бұл тақырып ауыл шаруашылығы дамыған аудан үшін аса өзекті. Мал шаруашылығы ауылдықтардың негізгі табыс көзі болғандықтан, оны қорғау бағытындағы шараларды күшейту – басты міндеттердің бірі.
Төртінші мәселе – білім беру ұйымдарындағы бейнебақылау камераларының жай-күйі мен олардың полиция бөлімінің жүйесіне қосылуы. Оқушылардың қауіпсіздігін қамтамасыз ету – күн тәртібіндегі басты мәселенің бірі. Бұл бағытта мектептердегі камераларды жаңарту және жүйені толық интеграциялау қажет екені айтылды.
Отырыста 2025 жылдың шілде айында аудан орталығында орын алған топтық жанжалдың себеп-салдарына да арнайы тоқталды. Жиында жанжалдың мән-жайы жан-жақты талқыланып, мұндай жағдайдың қайталанбауы үшін тиісті шараларды жүзеге асырудың маңыздылығы атап өтілді. Әлеуметтік тұрақтылықты қамтамасыз ету үшін жастар арасында түсіндіру жұмыстары мен қоғамдық тәртіпті күшейту қажеттігі айтылды.
Күн тәртібіндегі соңғы мәселе – патрульдік полицияның жол қауіпсіздігін қамтамасыз ету бағытында атқарған жұмыстары. Жол-көлік оқиғаларының алдын алу және жол қозғалысына қатысушылардың мәдениетін арттыруға бағытталған шаралар баяндалды.
Жиын қорытындысында қаралған мәселелер бойынша тиісті мекеме басшыларына хаттамалық тапсырмалар беріліп, олардың орындалуы қатаң бақылауға алынатыны атап өтілді.
Бұл комиссия отырысы құқық бұзушылықтың алдын алу – тек полицияның ғана емес, бүкіл қоғамның ортақ ісі екенін тағы бір мәрте айқындап берді. Аудан басшылығы алдағы уақытта да тұрғындардың қауіпсіздігін қамтамасыз етуді басты міндеттердің бірі ретінде қарастыра бермек.
Ақпарат көзі : https://www.gov.kz/memleket/entities/zhambyl-moyynkum/press/news/details/1058283?lang=kk
Жауап қалдыру