Қазақстан – азаматтық келісімді, түрлі мәдениеттер мен діндерді тоғыстырған көпұлтты, зайырлы мемлекет. Қай кезеңде де қазақ халқы ұлт өкілдеріне қамқорлық көрсете білді. Қазіргі таңда елімізде 100-ден аса ұлттар өмір сүреді.
Биыл баршамызға ортақ татулық пен бейбітшіліктің жарқын бір бейнесі болып табылатын, елімізде қоғамдық келісім мен ұлттық бірлікті нығайту мақсатында құрылған Қазақстан халқы Ассамблеясының 30 жылдығы атап өтілуде. Бұл құрылымның әрбір этнос пен барша қазақ халқының болашағы үшін алар орны ерекше. Оның қызметі Қазақстанның көпұлтты әрі көпмәдениетті қоғамын дамытуда үлкен маңызға ие. Ассамблея мүшелері саяси, экономикалық, әлеуметтік және жастар саясаты салаларында белсенділік танытып келеді.
Мемлекет басшысы әрдайым бірлік пен татулықты басты құндылық ретінде атап көрсетіп келеді. Қазақстан халқы Ассамблеясының сессиясында Президентіміз: «Ынтымағы бекем жұрттың болашағы баянды болады. Ел бірлігін нығайту және Отанымызды өркендету – қасиетті парыз», – деп нақты міндет қойды.
Бүгінде түрлі этнос өкілдері қазақ жерін мекен етіп, өз туған өлкесіндей қастерлейді. Олар Қазақстанның әлеуметтік-экономикалық, саяси, тарихи, мәдени дамуына өз үлестерін қосып келеді.
Ауданымызда да бірлігі бекем, татулығы тұрақты түрлі этнос өкілдері тату өмір сүруде. Мерейтой және «Бірлік пен келісім бағытындағы 30 жыл» іс-шарасы аясында Түркістан ауылдық округі Арыстанды елді мекенінде мерекелік кеш өтті. Шараға аудандағы этномәдени бірлестіктер қатысып,салт-дәстүрлерін таныстырды.
Аудандық мәслихат аппаратының басшысы Бақыт Жұмағұлов ауданның әлеуметтік-экономикалық дамуына қосқан елеулі үлесі мен жемісті еңбегі үшін бірқатар азаматтарды Сарысу ауданының Құрмет грамотасы және Сарысу аудандық мәслихатының Алғыс хатымен марапаттады. Шараның соңы аудандық мәдениет үйінің өнерпаздарының концерттік бағдарламасымен жалғасты.
Қоғамдық келісім мен саяси тұрақтылық – біздің басты байлығымыз. Бұл жетістіктерді бағалау, оны сақтау жолында аянбай еңбек ету әрбір Қазақстан азаматының міндеті болып табылады.
Қазақстан халқы Ассамблеясы еліміздің тұрақты дамуына және қоғамдық келісімнің нығаюына айтарлықтай үлес қоса беретіні сөзсіз. Отанымыздың іргесі берік, шаңырағы қашанда биік, бірлігіміз бекем болсын.
Ақпарат көзі : https://www.gov.kz/memleket/entities/maslihat-sarysu/press/news/details/1093686?lang=kk
Жауап қалдыру