Цифрлық технологиялардың қарқынды дамуына байланысты алаяқтық деректері жиілеп отыр. Мұндай қылмыстардың құрбаны әртүрлі жастағы азаматтар болуда. Қаскөйлер телефон қоңыраулары, мессенджерлер мен әлеуметтік желілер арқылы психологиялық қысым көрсету әдістерін қолданады.
Полиция қызметкерлерінің айтуынша, алаяқтардың басты мақсаты — азаматтың сеніміне кіру, жалған ақпарат арқылы қорқытып, эмоциялық күйге түсіру және жағдайды байыппен бағалау мүмкіндігін жою. Олар өздерін банк қызметкері, құқық қорғау органы немесе басқа да мемлекеттік мекеме өкілі ретінде таныстырып, азаматтарды жеке деректерін немесе қаражаттарын беруге итермелейді.
Полиция бөгде адамдарға жеке деректерді, банк картасының реквизиттерін, SMS арқылы келетін кодтарды және құпиясөздерді ешқашан хабарламауға шақырады. Күмәнді сілтемелерге өтпеу, белгісіз қосымшаларды орнатпау және таныс емес адамдардың нұсқауларын орындамау қажет, тіпті олардың сөздері сенімді болып көрінсе де.
Күдікті қоңыраулар немесе хабарламалар келген жағдайда сөйлесуді дереу тоқтатып, ресми нөмірлер арқылы тиісті қызметтермен өз бетіңізше байланысқан жөн. Егер сіз немесе жақындарыңыз алаяқтық әрекеттердің құрбаны болса, дереу полицияға жүгіну қажет.
Қарапайым сақтық шараларын сақтау азаматтардың қаражатын қорғап, құқыққа қайшы әрекеттерден сақтануға мүмкіндік береді.
#заңментәртіп #законипорядок #білгеніңізабзал #важнознать
Ақпарат көзі : https://www.gov.kz/memleket/entities/mvd-zhetysu/press/news/details/1151936?lang=kk
Жауап қалдыру