Хромтау ауданы аумағында ветеринария саласы бойынша жоспарлы профилактикалық және диагностикалық іс-шаралар кешені іске асырылған. Бұл туралы КМК «Хромтау аудандық ветеринариялық стансасы» басшысы Пиржан Алиев тікелей эфир барысында мәлімдеді.
Ветеринариялық станса басшысының айтуынша, есепті кезеңде ауыл шаруашылығы жануарлары арасында жұқпалы аурулардың алдын алу шаралары жоспарға сәйкес жүзеге асырылған:
• Сібір жарасына қарсы ондаған мың ірі қара, ұсақ мал және жылқы егілді;
• Аусыл, құтыру, қарасан, түйе обасы, күл, жоғары патогенді құс тұмауы сияқты ауруларға қарсы шаралар орындалды;
• Үй жануарлары эхинококкозға қарсы өңделіп, жабайы етқоректі жануарларға дәрілік жемдер таратылды.
Диагностикалық зерттеулер жүргізіліп, 12 мың бас ірі қара мал мен 500 бас жылқы тексерілді. Анықталған ауру жағдайлары бойынша ветеринариялық талаптарға сәйкес шаралар қабылданды, ауру малдар қайта өңдеу орындарына жіберілді.
Жануарларды бірдейлендіру жұмыстары толық көлемде жүргізіліп, 39 мыңнан астам мемлекеттік қызмет көрсетілді. Сонымен қатар «Tort Tulik» мобильді қосымшасы арқылы тіркеу жұмыстары жалғасуда.
Аудан аумағында биологиялық қалдықтарды залалсыздандыру нысандары жұмыс істеп, бірқатар ауылдық округтерде модульдік ветеринариялық пункттер орнатылды. Жоспар бойынша 2026 жылы ветеринариялық инфрақұрылым одан әрі кеңейтіледі.
«Жүргізілген жұмыстар аудан аумағында тұрақты эпизоотиялық ахуалды сақтауға мүмкіндік берді», — деп атап өтті Пиржан Алиев.
Ақпарат көзі : https://www.gov.kz/memleket/entities/aktobe-hromtau/press/news/details/1155101?lang=kk
Жауап қалдыру