Жезқазған қаласы полиция басқармасында заманауи форматтағы «Профилактикалық кабинет» ашылды.

Бұл бастама Қазақстан Республикасы Ішкі істер министрлігінің тапсырмасымен, «Құқық бұзушылықтар профилактикасы туралы» Заңды іске асыру және «Заң мен Тәртіп» тұжырымдамасы аясында жүзеге асырылуда. Негізгі мақсат – құқық бұзушылықтардың алдын алу бойынша атаулы жұмысты күшейтіп, полицияның сервистік моделін дамыту.

Жаңа кабинет полиция, денсаулық сақтау, білім беру, әлеуметтік қорғау органдары мен азаматтық қоғам өкілдерінің өзара іс-қимылын біріктіретін үйлестіру алаңына айналады. Мұнда тұрмыстық зорлық-зомбылық пен буллингтің алдын алу, алкоголизм мен нашақорлыққа қарсы іс-қимыл, девианттық мінез-құлықты түзету бағытында кешенді жұмыстар жүргізіледі.

Кабинетте полиция қызметкерлері құқықтық кеңес берсе, психологтар мен дәрігерлер дағдарыстық жағдайдағы азаматтарға көмек көрсетеді, ал әлеуметтік қызметкерлер қолайсыз отбасыларды сүйемелдейді.