Солтүстік Қазақстан облысына жұмыс сапары аясында Қазақстан Республикасы Ауыл шаруашылығы министрлігі Ветеринариялық бақылау және қадағалау комитетінің Төрағасы Қ.Қ. Тәшімов облыс аумағында орналасқан ветеринариялық бақылау бекеттеріне барды.
Сапардың мақсаты – ветеринариялық бақылау бекеттерінің қызметін ұйымдастыруды, Қазақстан Республикасының ветеринария саласындағы заңнамасы мен ветеринариялық қауіпсіздікке қатысты нормативтік құқықтық актілер талаптарының сақталуын тексеру, сондай-ақ аса қауіпті жануарлар ауруларының әкелінуі мен таралуының алдын алу шараларының тиімділігін бағалау болды.
Инспекциялық іссапар барысында бақылаудағы жүктерді тасымалдау кезінде мемлекеттік ветеринариялық-санитариялық бақылауды жүзеге асыру тәртібіне; ветеринариялық ілеспе құжаттарды ресімдеу талаптарының сақталуына; есепке алу және қадағалау ақпараттық жүйелерінің жұмыс істеуін қамтамасыз етуге; бекеттердің материалдық-техникалық жарақтандырылуы мен кадрлық қамтамасыз етілуіне; биологиялық қауіпсіздік шараларының сақталуына ерекше назар аударылды.
Жұмыс сапарының қорытындысы бойынша ветеринариялық бақылау бекеттері қызметінің тиімділігін арттыру, профилактикалық іс-шараларды күшейту және Қазақстан Республикасының ветеринария саласындағы заңнамасы талаптарының қатаң сақталуын қамтамасыз ету жөнінде нақты тапсырмалар берілді.
Сонымен қатар, уақытша шектеулер енгізілген өңірлер мен өнім түрлері бойынша мемлекеттік ветеринариялық-санитариялық бақылауға жататын жүктердің әкелінуі мен транзитіне жол бермеу мәселесіне ерекше назар аударылды.
Ветеринариялық бақылау және қадағалау комитеті елдің ветеринариялық қауіпсіздігін нығайтуға және Қазақстан Республикасының эпизоотиялық әл-ауқатын қорғауға бағытталған жүйелі жұмысты жалғастырады.
Ақпарат көзі : https://www.gov.kz/memleket/entities/vetcontrol/press/news/details/1165418?lang=kk
Жауап қалдыру