💊 🔴 МФБК және ДЗ мен МБ СҰО сапа менеджменті жүйесін жетілдіру және фармақадағалауды дамыту мәселелерін талқылады
Қазақстан Республикасы Денсаулық сақтау министрлігінің Медициналық және фармацевтикалық бақылау комитеті Дәрілік заттар мен медициналық бұйымдарды сараптау ұлттық орталығымен бірлесіп, Комитеттің аумақтық бөлімшелерінің 20 басшысының қатысуымен жұмыс кеңесін өткізді.
Кеңесті МФБК төрағасы Бауыржан Жүсіпов ашып, процестерді жүйелі трансформациялаудың, реттеушілік қызмет сапасын күшейтудің және қадағалау қызметінің сапасын арттырудың маңыздылығын атап өтті.
Кездесу барысында Дәрілік заттар мен медициналық бұйымдарды сараптау ұлттық орталығының сарапшылары қолданыстағы сапа менеджменті жүйесін дамыту бойынша практикалық тәсілдерді, оның ішінде процестерді стандарттау, стандартты операциялық рәсімдерді қолдану, ішкі аудиттер жүргізу және нәтижелілікті бағалау мәселелерін таныстырды.
«Сапа менеджменті жүйесін жетілдіру процестердің ашықтығын қамтамасыз етуге, реттеушілік тәуекелдерді төмендетуге және сала мен халықаралық әріптестер тарапынан сенімді нығайтуға мүмкіндік береді», — деп атап өтті Дәрілік заттар мен медициналық бұйымдарды сараптау ұлттық орталығының стратегия, талдау және сапа менеджменті жүйесін дамыту басқармасының басшысы Талғат Жасқайратов.
Талқылаудың маңызды бөлігі фармқадағалау бойынша жұмыстың тиімділігін арттыруға және дәрілік заттарға жағымсыз реакциялар, сондай-ақ иммундаудан кейінгі жағымсыз салдарлар туралы хабарлауды жандандыруға арналды.
Кеңес қатысушыларына ұлттық фармқадағалау жүйесімен өзара іс-қимылдың қолданыстағы алгоритмдері, соның ішінде «Дәрілік заттардың жанама әсерлері» бірыңғай ұлттық деректер базасымен жұмыс істеу тәртібі түсіндірілді.
Жүйенің функционалы жағымсыз реакциялар туралы ақпаратты электрондық форматта Дәрілік заттар мен медициналық бұйымдарды сараптау ұлттық орталығының ресми сайты — nnda.kz арқылы ұсыну мүмкіндігін көздейді.
Дәрілік заттар мен вакциналарға жағымсыз реакциялар туралы хабарламаларды тіркеу тәжірибесін күшейту реттеушінің басым міндеттерінің бірі екені ерекше атап өтілді. Бұл көрсеткіш қауіпсіздік мониторингі жүйесінің сезімталдығы мен тиімділігінің негізгі индикаторы ретінде қарастырылады.
Жағымсыз реакцияларды тіркеу процесін одан әрі жеңілдету және автоматтандыру мақсатында «Damumed» медициналық ақпараттық жүйесін ұлттық фармақадағалау деректер базасымен интеграциялау жүргізілуде. Жоба аясында жағымсыз реакцияларды жүйеде тікелей тіркеуді қамтамасыз ететін «Сары карталар» модулін іске қосу көзделген. Жобаны Қазақстан Республикасы бойынша іске қосу 2026 жылғы 23 ақпанға жоспарланған.
Дәрілік заттар мен медициналық бұйымдарды сараптау ұлттық орталығы медициналық ақпараттық жүйеден ұлттық фармқадағалау деректер базасына тіркелген «Сары карталарды» автоматты түрде беруді қамтамасыз ететін деректерді қабылдау сервисін дайындады. Бұл медициналық қызметкерлердің хабарламаларды ресімдеуге жұмсайтын уақытын едәуір қысқартуға және деректерді тіркеудің толықтығы мен жеделдігін арттыруға мүмкіндік береді.
Кездесу барысында халықаралық бенчмаркинг және үздік әлемдік реттеушілік тәжірибелерге сәйкестік мәселелері де қаралды. Сапа менеджменті жүйесі мен тиімді фармқадағалауды дамыту ұлттық реттеушілік жүйенің жетілу деңгейін арттырудың маңызды элементі.
Осындай іс-шараларды өткізу Медициналық және фармацевтикалық бақылау комитеті мен Дәрілік заттар мен медициналық бұйымдарды сараптау ұлттық орталығы арасындағы институционалдық өзара іс-қимылды нығайтуға және сапаға, қауіпсіздікке және ашықтыққа бағдарланған бірыңғай басқару мәдениетін қалыптастыруға ықпал етеді.
Ақпарат көзі : https://www.gov.kz/memleket/entities/dkmfk-almaty-oblast/press/news/details/1166087?lang=kk
Жауап қалдыру