Оқушылар арасында Мемлекеттік қызмет құндылықтарын және ерте кәсіби бағдарлауды ілгерілету бойынша

Ашық есік күні: мектеп оқушыларының мемлекеттік қызметпен танысуы

Жастардың құқықтық мәдениетін қалыптастыру және кәсіби бағдар беру мақсатында  Жданов ауылдық округі әкімінің аппаратында Жданов жалпы білім беретін мектебі жоғары сынып оқушыларына арналған Ашық есік күні өткізілді. Іс-шараның негізгі мақсаты – оқушыларды мемлекеттік қызметтің қағидаттары мен ерекшеліктерімен таныстыру, сондай-ақ мемлекеттік қызметшілер еңбегіне құрметпен қарауды қалыптастыру болды.

Кездесу барысында оқушыларға Қазақстан Республикасы мемлекеттік билік құрылымы, жергілікті атқарушы органдардың негізгі бағыттары және мемлекеттік қызметшілердің алдында тұрған міндеттер туралы кеңінен ақпарат берілді. Заңдылық, ашықтық, жауапкершілік және қоғамға қызмет ету қағидаттарына ерекше назар аударылды.

Оқушылар мемлекеттік қызметке қойылатын талаптар, қызметке қабылдау тәртібі және кәсіби құзыреттіліктің маңызы туралы білді. Сонымен қатар мемлекеттік қызметшілердің Әдеп кодексінің нормалары және сыбайлас жемқорлыққа қарсы заңнаманы сақтау қажеттігі түсіндірілді. Қазіргі заманғы мемлекеттік қызметшіге тән басты қасиеттер ретінде адалдық, жауапкершілік және отансүйгіштік атап өтілді.

Іс-шараның тәжірибелік бөлімінде оқушылар мамандардың жұмыс кабинеттерін аралап, азаматтарды қабылдау үдерісімен, өтініштерді қарау тәртібімен және құжат айналымын ұйымдастырумен танысты. Аппарат қызметкерлері өздерінің жұмыс тәжірибесімен бөлісіп, мемлекеттік қызметтің жауапкершілігі мен маңыздылығы туралы әңгімеледі.

Оқушылар әсіресе мансаптық өсу мүмкіндіктері, мемлекеттік қызметке орналасу үшін қажетті білім деңгейі және мемлекеттік басқару жүйесіндегі даму перспективалары жөніндегі сұрақтарға ерекше қызығушылық танытты.

Ашық есік күнін өткізу мемлекеттік органдар мен жастар арасындағы байланысты нығайтуға ықпал етті. Мұндай іс-шаралар жас ұрпақтың белсенді азаматтық ұстанымын қалыптастырып, құқықтық сауаттылығын арттырады және болашақ мамандықты саналы түрде таңдауға көмектеседі.

Осындай кездесулер өскелең ұрпақты өз еліне адал қызмет етуге және туған өлкенің дамуына лайықты үлес қосуға жігерлендіреді деп сенеміз.