Медицинада ұсақ-түйек болмайды. Диагноз қоюдан бастап емдік шараларды орындауға дейінгі әрбір кезең ем нәтижесіне тікелей әсер етеді. Осы үдерістегі аса маңызды, бірақ көп жағдайда көзге көрінбейтін буын медициналық құралдарды дұрыс өңдеу.
Халықаралық ұйымдардың деректеріне сәйкес, медициналық көмек көрсетуге байланысты инфекциялардың едәуір бөлігі инфекциялық бақылау талаптарын қатаң сақтау арқылы алдын алуға болады. Мұндай талаптардың негізін медициналық бұйымдарды дезинфекциялау мен стерилизациялау құрайды. Бұл қағидаттар Дүниежүзілік денсаулық сақтау ұйымының инфекциялардың алдын алу және инфекциялық бақылау жөніндегі ұсынымдарында нақты көрсетілген.
Медициналық құралдарды өңдеу – бірізді, өзара байланысты бірнеше кезеңнен тұратын процесс. Бұл кезеңдердің әрқайсысы дербес маңызға ие және олардың бірін де өткізіп жіберуге немесе формалды түрде орындауға болмайды.
Бірінші кезең – дезинфекция. Ол құрал қолданылғаннан кейін бірден жүргізіледі және бактериялар, вирустар мен саңырауқұлақтар сияқты инфекция қоздырғыштарын жоюға бағытталған. Уақытылы жүргізілген дезинфекция медицина қызметкерлерінің жұқтыру қаупін төмендетеді әрі биологиялық ластанулардың кеуіп кетуінің алдын алады.
Келесі кезең – стерилизация алдындағы тазалау. Бұл кезеңде құрал бетінде қалған қан, тіндер мен дәрілік заттардың қалдықтары толықтай жойылады. Тіпті болмашы ластанудың өзі стерилизация тиімділігін төмендетуі мүмкін, сондықтан механикалық тазалау мен мұқият жуу аса маңызды болып саналады.
Соңғы кезең – стерилизация. Ол барлық микроорганизмдерді, соның ішінде спора түзуші түрлерін толық жоюды қамтамасыз етеді. Стерилизация әдісі құралдың материалы мен функционалдық ерекшеліктеріне қарай таңдалады. Стерилизациялық жабдықтардың жұмыс режимін бақылау және оның тиімділігін тұрақты тексеру – қауіпсіздіктің міндетті шарты.
ДДҰ құжаттарында техникалық шаралар ұйымдастырушылық шешімдермен қатар жүруі тиіс екені атап көрсетілген. Атап айтқанда, бекітілген нұсқаулықтардың болуы, персоналды жүйелі оқыту және өңдеу талаптарының сақталуын тұрақты бақылау қажет. Тек осындай кешенді көзқарас медициналық құралдарды өңдеуді күнделікті тәжірибенің ажырамас бөлігіне айналдыра алады.
Пациент қауіпсіздігі үшін жауапкершілік тек дәрігерге ғана емес, бүкіл денсаулық сақтау жүйесіне жүктеледі. Медициналық бұйымдарды өңдеу процестері нақты ұйымдастырылып, қажетті ресурстармен және бақылаумен қамтамасыз етілген жағдайда, инфекциялық асқынулардың қаупі төмендеп, медицина қызметкерлерінің қауіпсіздігі күшейеді және халықтың медициналық ұйымдарға деген сенімі артады.
Медициналық құралдарды өңдеу пациентке көбіне байқала бермейді. Алайда дәл осы көзге көрінбейтін қорғаныс желісі қазіргі заманғы қауіпсіз медицинаның негізін қалайды.
Ақпарат көзі : https://www.gov.kz/memleket/entities/dsek-astana/press/news/details/1170791?lang=kk
Жауап қалдыру