«Көктем–2026»

«Көктем–2026» республикалық командалық-штабтық оқу-жаттығулары аясында Алматы қаласы Жетісу ауданының Төтенше жағдайлар басқармасы өзара іс-қимыл жасайтын қызметтермен бірлесіп, су тасқыны кезеңіне дайындыққа бағытталған бірқатар практикалық іс-шаралар өткізді.

 

Алғашқы кезекте Есентай өзенінің арнасын тазарту жұмыстары ұйымдастырылды. Жұмыстар Самырсын көшесі 39а мекенжайы маңындағы учаскеде жүргізілді. Негізгі мақсат — көктемгі су тасқыны кезінде судың кедергісіз өтуін қамтамасыз ету және су басу қаупін барынша азайту. Іс-шара барысында өзен арнасы қоқыстан, мұз қатпарларынан және қардың еруі кезінде судың өтуіне кедергі келтіруі мүмкін өзге де бөгеттерден тазартылды.

 

Оқу-жаттығудың екінші кезеңінде №102 мектеп базасында зардап шеккен тұрғындарды қабылдау пункті жасақталды.

 

Практикалық дайындық барысында:

•эвакуацияланған азаматтарды тіркеу тәртібі;

•тамақтандыруды ұйымдастыру;

•адамдарды спорт залға орналастыру (жинамалы кереуеттерді орнату, ұйықтау орындарын дайындау) көрсетілді.

 

Мектеп аумағында қосымша резервтік мүлік сақталған арнайы контейнер орнатылған. Онда:

•қысқы және жазғы шатырлар;

•үстелдер мен қажетті жабдықтар;

•жылу зеңбіректері (жылытқыштар);

•электр генераторлары және өзге де қажетті құрал-жабдықтар орналастырылған.

 

Сондай-ақ, мүліктің сақталу жағдайы, толықтығы және жедел пайдалануға дайындығы тексерілді.

 

Бұдан бөлек, оқу-жаттығу аясында мектеп оқушылары мен педагогикалық ұжымға профилактикалық түсіндіру жұмыстары жүргізілді. Мамандар көктемгі кезеңде және су тасқыны кезінде қауіпсіздік ережелерін түсіндірді.