Абай облысы Полиция департаменті заңсыз есірткі айналымына қарсы жүйелі және мақсатты жұмыстарын жалғастыруда. Ағымдағы жылдың басынан бері өңір аумағында есірткімен байланысты 28 қылмыс анықталып, барлық деректер бойынша қажетті процессуалдық шаралар қабылданып, тергеу әрекеттері жүргізілуде.
Сонымен қатар, 29 қылмыстық құқықбұзушылық тіркеліп, олардың авторларын анықтау және жауапқа тарту бағытында белсенді жұмыс жүргізілуде. Заңсыз айналымнан 51 килограмм әртүрлі есірткі және психотроптық заттар алынды.
Есірткі жеткізу арналарының анықталуы мен жойылуына ерекше мән берілуде. Жедел-іздестіру шаралары нәтижесінде синтетикалық есірткі жеткізудің екі тұрақты арнасы толықтай жабылып, бұл өңірдегі ұйымдасқан қылмыстық топқа елеулі соққы болды. Есірткі қылмысын жасаған 10 адам ұсталып, барлығы қылмыстық жауапкершілікке тартылуда, соның ішінде синтетикалық есірткі заңсыз сақтаған екі азамат бар.
Синтетикалық есірткінің таралуы бүгінгі таңда өзекті мәселелердің бірі болып отыр. Қазіргі кезде наркобизнес интернет-платформалар мен байланыссыз сауда тәсілдерін белсенді қолдануда, бұл құқық қорғау органдарынан жоғары дәрежедегі сақтықты талап етеді.
Абай облысы Полиция департаменті профилактикалық жұмысқа ерекше мән береді. Білім беру ұйымдарында дәрістер, деректі фильмдер көрсетілімдері өткізіліп, акциялар, флешмобтар және спорттық іс-шаралар ұйымдастырылуда. «Біз өмірді таңдаймыз — біз есірткіге қарсы» деген ұранмен жастарды заңсыз табыс көздеріне тартудың алдын алу басты басымдықтардың бірі болып отыр.
Департамент жұмысының негізгі бағыттарының бірі – есірткіден азат, қауіпсіз ортаны қалыптастыру. Бұл бағытта әрбір өңір тұрғыны заңсыз есірткі айналымының қауіп-қатерінен қорықпай, еркін өмір сүріп, дамуына жағдай жасалады.
Ақпарат көзі : https://www.gov.kz/memleket/entities/mvd-abay/press/news/details/1185546?lang=kk
Жауап қалдыру