Жетісу облысы Полиция департаментінде ерекше күн өтті — шынайы эмоцияға, қызығушылыққа және тәртіп сақшыларының қызметіне деген құрметке толы ашық есік күні ұйымдастырылды. Оның қонақтары студенттер мен «Жас сақшы» кадеттері болды — бәлкім, ертең-ақ өз өмірін заң мен қауіпсіздік жолындағы қызметпен байланыстыратын жастар.
Алғашқы сәттен бастап-ақ жас қонақтар тарих пен сабақтастықтың ерекше атмосферасына енді. Жетісу генералы Болсамбеков атындағы музейде олар жай ғана экскурсияға емес, өткенмен шынайы жүздесуге куә болды — ерлікке, тағдырға және қызметтің бастауында тұрған жандардың жарқын естелігіне. Бұл — тарихтың тіріліп, әрбір погонның артында ар-намыс, борыш және жауапкершілік тұрғанын еске салған сәт еді.
Іс-шара барысында Жетісу облысы Полиция департаментінің бастығы Сарқытбай Құсаиновтың жастарға арнаған ақжарма тілегі ерекше әсер қалдырды. Ол өз сөзінде өмірлік жолды дұрыс таңдаудың маңызын атап өтті:
«Полициядағы қызмет — жай ғана мамандық емес. Бұл — әділдік, батылдық және халық алдындағы жауапкершілік жолындағы күнделікті таңдау. Егер бір күні форма киюге шешім қабылдасаңыздар — оны абыроймен алып жүріңіздер», — деді ол.
Мазмұнды бағдарламаның жалғасы ретінде плацта арнайы көрсетілім өтті. Қонақтар заманауи қызметтің нақты көрінісін тамашалады: арнайы техника, жедел-криминалистикалық бөлімшелердің жабдықтары, сондай-ақ кинологиялық қызмет орталығы қызметкерлерінің кәсіби жұмысы ұсынылды. Нақтылық, үйлесімділік және жоғары деңгейдегі шеберлік ешкімді бейжай қалдырмады.
Бұл күн тек таныстыру шарасы ғана емес, ұрпақтар арасындағы көпірге, сенім мен ашықтықтың символына айналды. Біреулер үшін ол болашақ мамандыққа жасалған алғашқы қадам болса, енді біреулер үшін «полиция» сөзінің артында өз ісіне және еліне адал жандар тұрғанын ұқтырған маңызды сабақ болды.
Ақпарат көзі : https://www.gov.kz/memleket/entities/mvd-zhetysu/press/news/details/1186411?lang=kk
Жауап қалдыру