Астана қаласы Полиция департаментінің патрульдік полиция полкінде Наурыз мерекесіне арналған салтанатты іс-шара өтті. Бұл – халықтың ең маңызды әрі сүйікті мейрамдарының бірі.
Іс-шараға бөлім қызметкерлері ерекше дайындықпен келді: полк аумағы дәстүрлі қазақ ауылының атмосферасын бейнелейтін этнографиялық кеңістікке айналды. Кең әрі әсем безендірілген киіз үйлер тігіліп, тақырыптық аймақтар ұйымдастырылды. Онда көшпелі мәдениеттің символы ретінде жылқылар мен қойлар орналастырылды. Әрбір бөлшек ата-баба мұрасына деген құрметті және ұлттық құндылықтарды сақтауға деген ұмтылысты көрсетті.
Мерекелік бағдарлама тұтас қойылым ретінде ұйымдастырылып, қонақтарды қазақ халқының салт-дәстүрлерімен таныстырды. Жүргізуші әрбір элементтің мәні мен маңызын түсіндіріп отырды. Әсіресе «Сырға салу», «Беташар» және «Тұсаукесер» сияқты ұлттық салт-дәстүрлердің көрінісі көпшіліктің ерекше ықыласына бөленіп, адамның өміріндегі маңызды кезеңдерді айқын бейнеледі.
Іс-шараға Полиция департаментінің бастығы Марат Төлебаев, аудандық полиция басқармаларының басшылары, сондай-ақ ішкі істер органдарының ардагерлері – Марат Мусин мен Марат Ақшалов қатысты. Олар ұзақ жылдар бойы полк құрамында қызмет атқарып, елорда қауіпсіздігін қамтамасыз етуге үлес қосқан.
ІІМ ардагері Антидант Оңалбаев қатысушыларға ақ батасын беріп, зор денсаулық, амандық, бейбітшілік және қызметте табыс тіледі.
Мереке халық әндері мен билердің жанды орындалуымен сүйемелденіп, ерекше бірлік пен қуаныш атмосферасын қалыптастырды. Қатысушылар арасында ұлттық спорт түрлері де үлкен қызығушылық тудырды: арқан тарту, қой көтеру, гір көтеру және армрестлинг. Қызметкерлер өзара қолдау көрсетіп, күш-жігерін, төзімділігі мен командалық рухын танытты.
Айта кету керек, патрульдік полиция полкі елордадағы жол қозғалысы қауіпсіздігін қамтамасыз етумен қатар, қоғамдық тәртіпті сақтауда да маңызды рөл атқарады. Жеке құрам тәулік бойы қызмет атқарып, құқық бұзушылықтарға жедел әрекет етеді, қылмыстардың алдын алады, азаматтарға көмек көрсетеді және құтқару шараларына қатысады. Қызметкерлер оқиға орындарына алғашқылардың бірі болып жетіп, кәсібилік, жауапкершілік және кез келген жағдайда көмекке дайын екенін көрсетеді. Мереке күндері де олар қоғамдық тыныштықты күзетуде.
Ақпарат көзі : https://www.gov.kz/memleket/entities/mvd-astana/press/news/details/1187632?lang=kk
Жауап қалдыру