Қарағандыда ересектерге арналған мемлекеттік тілдің тегін курстарының екінші легі басталады. Оқытуды тілдерді дамыту басқармасы ұйымдастырады. Биыл облыс орталығында 900-ден астам тұрғынды, ал өңір бойынша 3 мыңнан астам адамды қамту жоспарланып отыр.
Бағдарлама қазақ тілін меңгеру деңгейін арттыруға, оны күнделікті өмірде және кәсіби ортада кеңінен қолдануға, сондай-ақ тілдік ортаны дамытуға бағытталған.
Курстар аптасына үш рет, үш ай бойы өткізіледі. Негізгі оқу көлемі 72 академиялық сағатты құрайды, қосымша ретінде сөйлеу клубтары (28 сағат) қарастырылған. Жалпы оқу ұзақтығы — 100 академиялық сағат.
Сабақтар қаладағы бірнеше нүктеде өтеді: «Абзал» сауда үйінде, Гоголь көшесі, 34 мекенжайындағы оқу сыныбында, Оңтүстік-Шығыс ауданындағы Достық үйінде, сондай-ақ Майқұдықтағы «Каскад» сауда үйінде тыңдаушыларға қолайлы уақытта (таңертең, түсте немесе кешке) ұйымдастырылады. Қатысушылар дайындық деңгейіне қарай — A1-ден C1-ге дейін бөлініп, осы деңгейлер бойынша толық бағдарламадан өте алады.
— A1 және A2 деңгейлері тілді нөлден бастап үйренетін немесе базалық білімін жетілдіргісі келетін тыңдаушыларға арналған. Ал B1, B2 және C1 бағдарламалары қазақ тілін терең меңгеріп, еркін қолдануға бағытталған, — дейді тілдерді дамыту басқармасының бас маманы Ұлжан Бөрібаева.
Курс соңында қатысушылар қорытынды емтихан тапсырып, белгіленген үлгідегі сертификат алады.
Өтінімді +7-702-448-98-68 (WhatsApp) нөмірі арқылы немесе QR-код арқылы электронды түрде беруге болады.
Сондай-ақ мына сілтеме арқылы тіркелуге мүмкіндік бар:
Өтінімдер сәуір айы бойы қабылданады, сабақтар мамырда басталады.
Ұйымдар үшін 15 адамнан бастап топ жинақталған жағдайда топтық тіркелу мүмкіндігі қарастырылған.
Ақпарат көзі : https://www.gov.kz/memleket/entities/karaganda/press/news/details/1190329?lang=kk
Жауап қалдыру