Тарифтік саясат пен сумен жабдықтау және су бұру саласының тұрақты дамуы арасындағы теңгерім

Бүгін Табиғи монополияларды реттеу комитетінің өкілдері «Сумен жабдықтау және су бұру 2030: жаңғырту, цифрландыру, тұрақтылық» атты салалық форумға қатысып, сумен жабдықтау және су бұру салаларындағы тарифтік саясаттың негізгі мәселелері бойынша баяндама жасады.

Сумен жабдықтау және су бұру саласы мемлекеттік саясаттың басым бағыттарының бірі болып қала береді. Сонымен қатар, сала бірқатар күрделі сын-қатерлерге тап болуда: кейбір өңірлерде инженерлік желілердің тозу деңгейі 60–70%-ға жетеді, ал су шығындары шамамен 20%-ды құрайды. Бұл елеулі ресурстық шығындарға әкеліп, жүйелі шешімдерді талап етеді.

Осы мәселелерді кешенді түрде шешу мақсатында «Энергетикалық және коммуналдық секторларды жаңғырту» ұлттық жобасы іске асырылуда. Жоба нүктелік жөндеуден ауқымды жаңғыртуға және инфрақұрылымды тиімді басқаруға көшуді көздейді.

Жоба аясында бүгінгі таңда нақты нәтижелерге қол жеткізілді: 31,6 млрд теңге сомасына 17 пилоттық жоба қаржыландырылды. Цифрлық платформада жалпы құны 1,2 трлн теңгені құрайтын 460 жоба жинақталған, оның ішінде 142 жоба (30%) сумен жабдықтау және су бұру салаларын дамытуға бағытталған.

Тарифтік саясат тұтынушылар мен табиғи монополия субъектілерінің мүдделерінің теңгерімін ескере отырып қалыптастырылуда. Тарифтердің өсуі кезең-кезеңімен және негізді түрде жүзеге асырылады, сондай-ақ әлеуметтік осал топтарға атаулы қолдау көрсету сақталады.

Саланы цифрландыруға ерекше назар аударылуда. Заманауи технологияларды енгізу нақты уақыт режимінде шығындарды бақылауға, апаттық жағдайларға жедел әрекет етуге, есеп айырысудың ашықтығын арттыруға және тұтынушылардың сенімін нығайтуға мүмкіндік береді. Су шығындарын 5–10%-ға төмендетудің өзі елеулі экономикалық тиімділік беріп, саланы дамытуға қосымша ресурстар қалыптастырады.

Қазіргі уақытта саланы ауқымды жаңғырту үшін барлық қажетті жағдайлар жасалған — нормативтік, қаржылық және тарифтік құралдар қалыптастырылған. Негізгі міндет — жобаларды іске асыру қарқынын жеделдету, олардың тиімділігін арттыру және инвестициялардан барынша нәтиже алу.

Ақпарат көзі : https://www.gov.kz/memleket/entities/krem/press/news/details/1191960?lang=kk