Қызметкерлерді жазатайым оқиғалардан міндетті сақтандыру олардың құқықтары мен қауіпсіздігін қорғаудың маңызды кепілі болып табылады. Қазақстан Республикасының еңбек заңнамасына сәйкес жұмыс беруші өз қызметкерлерін еңбек міндеттерін орындау кезінде олардың өміріне немесе денсаулығына зиян келтірілген жағдайда сақтандыруға міндетті.
Осылайша, ҚР Еңбек кодексінің 182-бабы 2-тармағының 14-тармақшасына сәйкес жұмыс беруші (АҚ, ЖШС, ЖК, ФШ, ШҚ, ШЖҚ МКК, КЕАҚ, МҚКК) қызметкерді еңбек (қызметтік) міндеттерін атқару кезінде жазатайым оқиғалардан сақтандыруға міндетті. Бұл норма мемлекеттік мекемелердің қызметкерлеріне қолданылмайды.
Бүгінгі таңда облыс аумағында 7 компания (Freedom Finance life, Nomad Life, New Life, Standart Life, Халық life, Евразия) қызметкерлерді жазатайым оқиғалардан сақтандыруды жүзеге асырады.
Мұндай сақтандырудың мәні — жұмыс орнында жазатайым оқиға орын алған жағдайда қызметкерді қаржылай қолдаумен қамтамасыз ету. Бұл жарақат алу, еңбекке қабілеттілігін жоғалту немесе денсаулығының өзге де зақымдануы болуы мүмкін. Мұндай жағдайларда сақтандыру компаниясы келтірілген зиянның орнын толтыруға көмектесетін төлемдерді жүзеге асырады.
Міндетті сақтандыру «Қызметкер еңбек (қызметтік) міндеттерін атқарған кезде оны жазатайым оқиғалардан міндетті сақтандыру туралы» арнайы заңмен реттеледі, оған сәйкес оның негізгі мақсаты қызметкерлердің мүліктік мүдделерін қорғау болып табылады. Қарапайым тілмен айтқанда, бұл — қиын жағдайда қызметкер мен оның отбасының күнкөріс қаражатынсыз қалмауына көмектесетін тетік.
Сақтандыру шарты жұмыс беруші мен сақтандыру ұйымы арасында жазбаша нысанда жасалады. Бұл ретте, шартты жұмыс беруші жасасқанына қарамастан, ол қызметкердің пайдасына ресімделеді. Өйткені бұл сақтандыру төлемдерін қызметкер алатынын білдіреді.
Сақтандырудың тек қағаз жүзіндегі шара емес екеніне аса назар аудару қажет. Ол еңбекті қорғау жүйесінде маңызды рөл атқарады, жұмыс берушінің жауапкершілігін арттырады және қызметкерлердің сенімін қамтамасыз етеді.
Сонымен қатар, бұл міндетті орындамағаны үшін жауапкершілік қарастырылған.
ҚР ӘҚБтК-нің 230-бабына сәйкес міндетті сақтандыру шартын жасасудан жалтарған кезде:
– жеке тұлғаларға — 10 АЕК;
– шағын кәсіпкерлік субъектілеріне немесе коммерциялық емес ұйымдарға — 160 АЕК;
– орта кәсіпкерлік субъектілеріне — 400 АЕК;
– ірі кәсіпкерлік субъектілеріне — 1000 АЕК мөлшерінде әкімшілік айыппұл салынады.
Ақпарат көзі : https://www.gov.kz/memleket/entities/sko-enbek/press/news/details/1193336?lang=kk
Жауап қалдыру