Қарағанды облысында 2025–2027 жылдарға арналған медициналық кадрлармен қамтамасыз ету жөніндегі Жол картасы іске асырылуда. Құжат мамандарды даярлаудан бастап, оларды жұмыс орнында тұрақтандыруға дейінгі барлық кезеңдерді қамтиды. Өткен жылы өңірдің мемлекеттік медицина ұйымдарына 187 жас маман келген. Биыл тағы 77 резидент-дәрігер мен 390 орта буын қызметкері келіп қосылады деп күтілуде.
Кадр тапшылығын шешу мәселесі аппараттық кеңесте облыстық денсаулық сақтау басқармасының басшысы Самат Кенжебаевтың баяндамасында көтерілді.
— Бүгінде облыстың мемлекеттік медицина ұйымдарында 12 мыңнан астам маман жұмыс істейді. Дегенмен тапшылық сақталып отыр — 144 бірлік, оның ішінде 95-і дәрігерлер. Ең үлкен жетіспеушілік жалпы тәжірибелік дәрігерлер, акушер-гинекологтар, анестезиолог-реаниматологтар, педиатрлар және бірқатар тар бейінді мамандар арасында байқалады. Бұл мәселені шешу үшін негізгі басымдық облыс аумағында тұратын Қарағанды медицина университеті мен медициналық колледждердің түлектері есебінен өз кадрларымызды даярлауға беріліп отыр, — деді Самат Кенжебаев.
Қарағанды медицина университетінде бюджет есебінен 254 интерн мен резидент білім алуда, олардың 125-і биыл оқуын аяқтайды. Сонымен қатар облыс әкімінің гранттары тиімді пайдаланылып келеді. Алдағы екі жылда өңір колледждері 700-ден астам орта буын маманын даярлап шығарады.
Сонымен қатар қолдау шаралары да күшейтілуде: көтерме төлемдер, тұрғын үймен қамтамасыз ету, коммуналдық шығындарды өтеу. 2025 жылы мұндай көмекті 117 маман алды. Бұл кадрларды, әсіресе ауылдық жерлерде, тұрақтандыруға мүмкіндік берді.
Жол картасы аясында тәлімгерлік институты енгізіліп, мамандарды шетелде қайта даярлау жұмыстары ұйымдастырылған.
Қарағанды медицина университетінің ректоры Бақыт Көшерованың айтуынша, оқу орнында 8,8 мыңнан астам студент білім алуда, олардың мыңнан астамы — Қарағанды облысының тұрғындары. Биыл 788 дәрігер-интерн оқуын аяқтайды, олардың бір бөлігі өңірдің денсаулық сақтау жүйесіне жұмысқа орналасуы мүмкін.
Облыс әкімі Ермағанбет Бөлекпаев Жол картасын іске асыруды жалғастыруды және жоспарланған барлық шаралардың орындалуын қамтамасыз етуді тапсырды. Сондай-ақ ол ауылдық елді мекендер мен моноқалаларда мамандарды тұрақтандыруға ерекше назар аударуды жүктеді.
Ақпарат көзі : https://www.gov.kz/memleket/entities/karaganda/press/news/details/1194360?lang=kk
Жауап қалдыру