Алматыда шетелдік туризм құрылымында бірқатар өзгерістер байқалуда. Негізгі халықаралық нарықтардың үлесі артып, қалаға келетін туристік ағынның географиясы кеңейіп келеді.

2025 жылғы деректерге сәйкес, Алматыға келетін туристердің басым бөлігін Ресей, Қытай, Үндістан, Түркия және Оңтүстік Корея елдері құрайды.

Ресей туристер саны бойынша көшбасшылық орнын сақтап отыр – 163 мың адам. Қытайдан келушілер саны айтарлықтай өсіп, 136,4 мыңға жетті, бұл бір жыл ішінде 37,6%-ға артқанын көрсетеді. Үндістаннан келген туристер саны 120,6 мыңды құрады. Түркия мен Оңтүстік Корея да алдыңғы бестікке еніп, сәйкесінше 36 954 және 23 200 турист көрсеткішін көрсетті.

Қытай бағыты ерекше қарқынмен дамып келеді. Mastercard Tourism Insights деректеріне сәйкес, Қытайдан Алматыға ұшақ билеттеріне деген іздеу саны бір жыл ішінде 30 миллионнан 56 миллионға дейін артқан.

Бұл өсімге Алматы мен Қытайдың ірі қалалары – Шанхай, Пекин, Чэнду және Гуанчжоу арасындағы тікелей әуе рейстерінің көбеюі ықпал етті. Нәтижесінде Қытай Алматының негізгі туристік нарықтарының бірі ретіндегі позициясын нығайтып келеді.

Ақпарат көзі : https://www.gov.kz/memleket/entities/almaty-tourism/press/news/details/1195693?lang=kk