Ақтөбе қаласында коммуналдық инфрақұрылымды жаңғырту бағытындағы жұмыстар жүйелі түрде жалғасуда. 2026 жылы «Aqtobe su-energy group» АҚ жылумен қамту саласында бірқатар ірі жобаларды іске асыруды қолға алып отыр. Бұл бастамалар өңірдің инженерлік желілерін жаңарту арқылы тұрғындарға көрсетілетін қызмет сапасын арттыруға бағытталған.
Компанияның мәліметінше, биыл 10 жоба инвестициялық бағдарлама аясында жүзеге асырылады. Соның нәтижесінде шамамен 2 100 метр жылу желісі жаңартылмақ. Бұдан бөлек, кәсіпорынның өз қаражаты есебінен тағы 1 900 метр жылу құбыры ауыстырылады. Жалпы, қала бойынша жылу желілерін жаңарту жұмыстары кең ауқымды қамтып отыр.
Қазіргі таңда жылу желілерін қайта жаңғырту және қазандықтарды оңтайландыру бойынша жобалау-сметалық құжаттар әзірлену үстінде. Бұл құжаттар алдағы кезеңдегі құрылыс және жөндеу жұмыстарының сапалы әрі тиімді жүргізілуіне негіз болады.
Аталған шаралардың басты мақсаты – инженерлік инфрақұрылымның тозу деңгейін төмендету, жылу жүйелерінің сенімділігі мен энергия тиімділігін арттыру. Бұл өз кезегінде қысқы маусымда апаттық жағдайлардың алдын алып, тұрғындарды тұрақты жылумен қамтуға мүмкіндік береді.
Жаңғырту жұмыстары барысында уақытша қолайсыздықтар да туындауы мүмкін. Атап айтқанда, ыстық сумен қамту уақытша шектелуі ықтимал. Мұндай жағдайлар туралы тұрғындарға алдын ала ресми ақпарат көздері мен байланыс арналары арқылы хабар берілетін болады.
Ақпарат көзі : https://www.gov.kz/memleket/entities/aktobe/press/news/details/1200477?lang=kk
Жауап қалдыру