2026 жылғы 17 сәуірде Ұлан ауданының орталығы Қасым Қайсенов кентінде еркін күрестен спорт шебері, жоғары ұлттық дәрежедегі төреші Уәлихан Ақмиұлы Можербаевты еске алуға арналған жасөспірімдер арасындағы республикалық турнирдің салтанатты ашылу рәсімі өтті. Балалар шығармашылық үйінде ұйымдастырылған бұл додаға еліміздің түрлі өңірлерінен, атап айтқанда Семей, Өскемен қалалары мен Алтай, Глубокое, Зайсан, Марқакөл, Тарбағатай, Үлкен Нарын, Шемонаиха және Ұлан аудандарынан келген 10 команда, барлығы 137 жас палуан жиналды. 2009–2010 және 2011 жылы туған спортшылар боз кілемде өзара мықтыны анықтап, шеберлік байқасуда.
Турнирдің басты мақсаты — жасөспірімдер арасында еркін күресті дәріптеу, салауатты өмір салтын насихаттау және қазақ спортының дамуына өлшеусіз үлес қосқан тұлғаның есімін мәңгі есте қалдыру. Мәскеу дене шынықтыру институтын тәмамдап, ұзақ жылдар бойы ұстаздық еткен Уәлихан Ақмиұлы көптеген дарынды шәкірттер тәрбиелеп, ел спортының өркендеуіне негіз қалаған болатын. Салтанатты шараға облыстық спорт басқармасының өкілдері, жергілікті атқарушы орган басшылары, облыстық күрес федерациясының президенті Марат Мұзапаров және спорт ардагерінің ұрпақтары қатысып, қатысушыларға сәттілік тіледі. 19 сәуірге дейін жалғасатын бұл жарыс болашақ чемпиондардың бағын ашатын маңызды додаға айналмақ.
Ақпарат көзі : https://www.gov.kz/memleket/entities/vko-sport/press/news/details/1203315?lang=kk
Жауап қалдыру