ҚР Оқу-ағарту министрлігі педагогтерді аттестаттаудың жаңартылған тәсілдерін ұсынды. Өзгерістер мұғалімдерге түсетін артық жүктемені азайтуға, артық рәсімдерді қысқартуға және кәсіби қызметті бағалаудың неғұрлым объективті жүйесін қалыптастыруға бағытталған.
Жаңа модельде педагогтердің басым бөлігі үшін пәндік білім бойынша міндетті тестілеу алынып тасталады. Бұл ретте тестілеу педагогикалық мамандыққа алғаш рет келетін түлектер, қызметін қайта бастайтын педагогтер, сондай-ақ білім беру ұйымдарының басшылары, олардың орынбасарлары мен әдіскерлер үшін сақталады. Бағалау тест нәтижесіне емес, педагогтің күнделікті жұмысына және білім сапасына қосқан нақты үлесіне негізделеді.
Сонымен қатар аттестаттауға қойылатын талаптар қайта қаралуда. Эссе жазу, ғылыми мақалалар жариялау, авторлық бағдарламалар мен оқу-әдістемелік материалдар әзірлеу талаптары алынып тасталды. Аталған талаптар қосымша жүктеме туғызып, оқыту сапасына елеулі әсер етпеген.
Негізгі тетіктердің бірі ретінде үдерісті толық цифрландыру көзделген. Барлық біліктілік санаттары бойынша аттестаттау мемлекеттік ақпараттық жүйелермен ықпалдастырылған «Ұстаз» платформасы арқылы өтеді. Платформада еңбек өтілі, біліктілігі, кәсіби жетістіктері, сертификаттары және портфолиоға қажетті өзге де мәліметтер автоматты түрде қалыптастырылады.
Қолданыстағы заңнамаға сәйкес тестілеуден сәтті өтіп, шекті балл жинап, портфолио тапсырған педагогтерге мәлімделген біліктілік санаты бойынша үстемеақы 1 қыркүйектен бастап төленеді.
Алғашқы тестілеуде шекті деңгейге жете алмаған, бірақ талаптарға сай портфолиосы бар педагогтерге шілде айында тестілеуді қайта тапсыру мүмкіндігі беріледі. Қайта тестілеу қорытындысы бойынша да шекті балл жиналмаған жағдайда тиісті біліктілік санаты берілмейді.
Сонымен бірге қайта тестілеуден өтуді қаламайтын педагогтер биылғы қыркүйектен бастап пилоттық режимде іске асырылатын жаңа модель аясында аттестаттауға қатыса алады. Тиісті бұйрық жобасы келісу сатысында.
Жаңа модельде біліктілік санаттары бойынша ашық сабақтар саны мен біліктілікті арттыру сағаттарының көлемі де қысқартылады. Негізгі назар педагогтің практикалық жұмыс нәтижелеріне, жобаларға қатысуына, тәрбие жұмысына және кәсіби тәжірибесін таратуына аударылады.
Министрлік өтпелі кезеңде педагогтердің құқықтары толық сақталатынын атап өтеді. Аттестаттау тек қосымша қаржылық ынталандыру құралы ғана емес, ең алдымен педагогтің кәсіби қызмет сапасын объективті бағалау тетігі ретінде қарастырылады. Жүйе педагог уақытын артық есептілікке емес, білім алушылармен жұмысқа бағыттайтындай етіп құрылады.
Ақпарат көзі : https://www.gov.kz/memleket/entities/edu/press/news/details/1204738?lang=kk
Жауап қалдыру