2026 жылы ол «Безгекті жоюға деген ұмтылыс бізді алға жетелейді: енді біз істей аламыз. Енді біз істеуіміз керек» ұранымен өтеді.
Бұл күннің мақсаты — 2016–2030 жылдарға арналған ДДҰ-ның жаһандық техникалық стратегиясына сәйкес ауруды жою үшін ресурстарды жұмылдыру, жаңа вакциналар, дәрі-дәрмектер мен диагностикалық әдістерді әзірлеудің қажеттілігіне назар аудару, сондай-ақ халыққа алдын алу шараларының маңызын түсіндіру.
Безгек — масалар арқылы таралатын қауіпті ауру болып қала береді. Бұл әсіресе Африка елдері үшін өзекті, мұнда өлім жағдайларының 95%-ға дейіні тіркеледі, олардың басым бөлігі балалар арасында кездеседі. Қазақстан Республикасы 2012 жылы ДДҰ тарапынан безгектен азат ел ретінде ресми түрде танылды. Қазақстанда безгек бойынша эпидемиологиялық жағдай қолайлы, 2002 жылдан бері елде тек сырттан әкелінген жағдайлар ғана тіркеледі.
Безгек — қызба ұстамаларымен, қаназдықпен және көкбауырдың ұлғаюымен сипатталатын паразиттік тропикалық ауру. Ауру науқас адамнан сау адамға Anopheles туысына жататын аналық масалардың шағуы арқылы жұғады. Сондай-ақ безгек қан құю кезінде немесе жатырішілік жолмен, яғни ауру анадан құрсақтағы балаға берілуі мүмкін. Аурудың басталуы басқа да бактериялық және вирустық ауруларға (ЖРВИ, пневмония, гепатит және т.б.) ұқсас болады. Жұқтырылған маса шаққаннан кейінгі жасырын кезең 14 күннен 1,5 жылға дейін созылуы мүмкін. Безгектің үш түрі (үш күндік, төрт күндік және «овале») әдетте жеңіл өтеді және сирек жағдайда өлімге әкеледі, ал тропикалық безгек дер кезінде және дұрыс емделмеген жағдайда ауыр асқынуларға және науқастың өліміне әкелуі мүмкін.
Көбінесе жұқтыру безгек кең таралған аймақтарға барған кезде орын алады. Безгектің алдын алу жұқтырудың алдын алу мен аурудың алдын алу шараларын қамтиды. Жұқтырудың алдын алу — тасымалдаушылардан қорғану (терезелерге тор орнату) және олардың шағуынан сақтану (дәкелі торларды пайдалану, масаларды электрофумигаторлар арқылы инсектицидтік құралдармен жою, ашық ауада дененің ашық жерлеріне репелленттер жағу). Сондай-ақ безгекке қарсы күресте тасымалдаушылармен (безгек масаларымен) күрес шаралары маңызды орын алады.
Аурудың алдын алу безгек таралған аймақтарға барған кезде жүргізіледі. Алдын алудың негізгі тәсілі — безгекке қарсы дәрілерді қолдану, оларды сапарға шығардан бір апта бұрын бастап, бүкіл сапар барысында және оралғаннан кейін тағы бір ай бойы қабылдау қажет. Безгекке қарсы препараттарды дәрігер тағайындауы тиіс. Безгек таралған елде болғаннан кейін үш жыл ішінде дене қызуы көтерілген жағдайда, дәрігерге эндемиялық аймақта болғаныңызды міндетті түрде хабарлау қажет.
Ақпарат көзі : https://www.gov.kz/memleket/entities/departament-kkbtu-kostanay/press/news/details/1207680?lang=kk
Жауап қалдыру