Қарағанды облысында егде жастағы адамдардың белсенді демалысын ұйымдастыру мүмкіндіктері кеңейтілуде. Абай ауданында жүзеге асырылып жатқан «Белсенді ұзақ өмір» жобасы зейнеткерлерге тек денсаулыққа пайдалы сабақтар ұсынып қана қоймай, заманауи дағдыларды меңгеруге де жол ашады.
Жобаның маңызды ерекшелігі — оқыту мен түрлі іс-шараларды ұйымдастыруға және өткізуге жастардың қатысуы. Ұйымдастырушы — «Жастар альянсы» қоғамдық бірлестігі.
Жоба аясында денсаулық мектебі жұмыс істейді: 50 жастан асқан қатысушылар жаттығуларға қатысып, созылу және буындарға арналған гимнастикамен айналысады. Сонымен қатар цифрлық сауаттылық курстары іске қосылған. Онда егде жастағы адамдарға смартфонды пайдалану, мобильді қосымшалармен жұмыс істеу және электронды мемлекеттік қызметтерді қолдану үйретіледі.
Рита Ким зейнетке шыққанына шамамен 13 жыл болғанымен, белсенді өмір салтын ұстануға тырысады. Бұған дейін ол йога курстарына қатысқан, алайда орталықтағы сабақтар, оның пікірінше, егде жастағы адамдарға анағұрлым бейімделген — бағдарлама қатысушылардың мүмкіндіктерін ескереді, жаттығулар орындауға қолайлы етіп таңдалған.
Жүктеме айтарлықтай қарқынды болғанымен, зейнеткерлердің шамасына қарай құрылған. Қазір зейнеткер цифрлық сауаттылық тренингтеріне де қатысуда.
— Қазір смартфонсыз өмірді елестету қиын. Біз мобильді қосымшалармен жұмыс істеуді, электронды қызметтерді пайдалануды және eGov порталында құжаттармен онлайн жұмыс істеуді үйреніп жатырмыз, — дейді белсенді зейнеткер. — Мұндай бағдарламалар аға буын үшін шынымен қажет. Оның үстіне, бұл — қарым-қатынас жасауға да мүмкіндік.
Ұйымдастырушылардың айтуынша, жоба нақты сұраныстан туындаған.
— Біз жастар ұйымы болғанымызбен, соңғы үш жылда ардагерлер кеңесімен белсенді жұмыс істеп келеміз. Бос уақытты тиімді өткізу мен спорттық сабақтарды ұйымдастыру жөніндегі ұсыныстар сол кісілерден түсті. Біз зейнеткерлермен кездесіп, осы жобада нені көргісі келетінін бірге талқыладық, — дейді «Жастар альянсының» төрағасы Темірлан Кәкенов.
Қазіргі уақытта жоба кеңейтіліп жатыр. Денсаулық мектебі мен цифрлық сауаттылық курстарынан бөлек, қолөнер клубын іске қосу жоспарлануда — онда тоқу, кесте тігу және кейіннен жұмыстар көрмесін ұйымдастыру қарастырылған.
Тұрақты сабақтардан бөлек, мәдени іс-шаралар да жоспарланған: Қарағанды театрларына бару, ең белсенді зейнеткерлер үшін Астанаға экскурсиялар, сондай-ақ бұқаралық кездесулер өткізу. Осы айда кезекті кеш Топар кентіндегі «Энергетик» мәдениет үйінде өтеді.
— Зейнеткерлерге қамқорлық жасау, олардың бос уақытын ұйымдастыру, шығармашылық әлеуетін жүзеге асыруға жағдай жасау және қоғамның белсенді өміріне тарту — басым бағыттардың бірі. Бұл тұрғыда Абай ауданында нәтижелі жұмыс жүргізіліп жатыр. Мұның бәрі белсенділікті сақтауға және қарым-қатынас жасауға мүмкіндік береді, — дейді жобаға қатысушылардың бірі Жарқын Әліпова.
Жастардың қолдауының арқасында Абай ауданының зейнеткерлері заманауи әрі әлеуметтік белсенді өмірге тартылып отыр.
Ақпарат көзі : https://www.gov.kz/memleket/entities/karaganda/press/news/details/1208560?lang=kk
Жауап қалдыру