Теміржол вокзалында өрт шығуы мүмкін деген алғашқы хабарламалар төтенше жағдайлар қызметтерін күшейтілген дайындық режиміне келтіруге негіз болды. Жолаушылардың көп шоғырлануы мен нысанның стратегиялық маңыздылығын ескере отырып, күштер мен құралдар шартты оқиға орнына жедел түрде бағытталды.
Алайда бұл жағдай нақты төтенше оқиға емес, теміржол инфрақұрылымы нысанында өткізілген жоспарлы оқу-жаттығу тактикалық өрт сөндіру іс-шарасы болып табылады. Іс-шараның негізгі мақсаты — шартты өртті жою бойынша әрекеттерді пысықтау және тартылған барлық жедел қызметтердің өзара іс-қимылын жетілдіру.
Жаттығу сценарийіне сәйкес, сауда орындарының бірінің екінші қабатында электр сымдарының қысқа тұйықталуы салдарынан шартты өрт орын алып, оның көрші бөлмелерге таралу қаупі туындады. Нысан қызметкерлері тарапынан «101» қызметіне дер кезінде хабар берілді.
Бөлімшелер келген сәттен бастап бірыңғай басқару жүйесі ұйымдастырылды: өрт сөндіру штабы құрылып, жұмыс учаскелері айқындалды, нысан электр қуатынан ажыратылды.
Шартты өртті жою жұмыстарына негізгі күштермен қатар өрт сөндіру пойызы тартылып, ол теміржол инфрақұрылымы жағдайында өрт ошағын оқшаулауға су беру және қолдау жұмыстарын қамтамасыз етті. Бұл барлық тартылған бөлімшелердің іс-қимыл тиімділігі мен үйлесімділігін арттырды.
Өрт сөндіру бөлімшелері шартты өрт ошағын жедел түрде оқшаулап, оның одан әрі таралуына жол бермеді. Сонымен қатар құтқарушылар адамдарды эвакуациялау барысын бақылауды қамтамасыз етіп, әрекеттерді шынайы жағдайға барынша жақын форматта пысықтады.
Жаттығуға 18 өрт сөндіру техникасы, Шымкент қаласы ТЖД жеке құрамы мен офицерлік құрам, жедел-құтқару жасағы, Апаттар медицинасы орталығының мамандары, жедел жәрдем бригадалары, сондай-ақ өрт сөндіру пойызы жұмылдырылды.
Сонымен қатар жаттығуға электр желісі ұйымының мамандары (электриктер), газ қызметі және су арнасы мекемесінің мамандары қатысып, шартты өрт жағдайында инженерлік коммуникацияларды ажырату және қайта қосу бойынша өзара іс-қимылды пысықтады.
Мұндай оқу-жаттығулар төтенше жағдайларға дайындық деңгейін арттыруға және күрделі инфрақұрылым нысандарында барлық қызметтердің өзара іс-қимылын жетілдіруге мүмкіндік береді.
Ақпарат көзі : https://www.gov.kz/memleket/entities/emer-shymkent/press/news/details/1212064?lang=kk
Жауап қалдыру