Өмірді өзгертетін таңдау: мектеп-лицей оқушылары «Таңдау» спектаклін тамашалады
Бүгін Дарынды балаларға арналған облыстық мамандандырылған мектеп-лицей-интернатының оқушылары есірткіге қарсы бағытталған «Таңдау» қойылымының көрермені болды.
ШҚО Полиция департаменті Есірткі қылмысына қарсы іс-қимыл басқармасы мен «SAMGA» даму орталығы ұйымдастырған бұл спектакль өнер арқылы жастар арасында есірткі қылмысы мен нашақорлықтың алдын алуды көздейді.
Жантай Тұрысбековтің туындысы «есірткі жасырушылар» мен оңай олжаға кенелу сезімі туралы баяндай отырып, жасөспірімдерге қылмыс әлемінің шынайы бет-бейнесін көрсетті.
Жас актерлердің шынайы ойыны жай ғана дәрісті заң бұзушылықтың зардаптары туралы ашық әрі тікелей диалогқа айналдыра білді.
Құрғақ деректердің орнына жанды эмоциялар ұсынылып, бұл әрбір көрерменді дұрыс таңдау жасаудың маңыздылығы туралы ойландырды.
«Шығармашылық арқылы алдын алу» форматы өзінің тиімділігін дәлелдеді: қойылым аяқталғаннан кейін оқушылар көргендерін ұзақ талқылап, бір ғана қате қадамның болашаққа балта шабуы мүмкін екенін түсінді.
ШҚО ПД баспасөз қызметі
Ақпарат көзі : https://www.gov.kz/memleket/entities/mvd-vko/press/news/details/1214835?lang=kk
Жауап қалдыру