Жаңбырлы ауа райына қарамастан, «Алтын дән» мәдениет үйінің алдындағы алаңға бұл маңызды мерекені атап өтуді қалаған мыңнан астам адам жиналды. «Ұлттар достығы!» халықтық серуені Қазақстанның мәдени әралуандығының байлығын айқын көрсеткен жарқын оқиғаға айналды.
Мереке аясында «Мың алғыс саған, туған ел!» этноқалашығы ұйымдастырылып, келушілер мол дастарқаннан дәм татып, түрлі халықтардың салт-дәстүрлерімен танысуға мүмкіндік алды. Қазақ, орыс, грузин, корей және басқа да халықтардың ұлттық тағамдары қонақтарды ерекше дәмімен қуантты, достық пен жылулық атмосферасын қалыптастырды.
Жоба Қостанай облысының Психологтар қауымдастығы тарапынан Қостанай ауданы әкімдігінің мәдениет және тілдерді дамыту бөлімі қолдауымен, ішкі саясат бөлімінің мемлекеттік әлеуметтік тапсырысы аясында жүзеге асырылды. Бұл әріптестік түрлі ұлт өкілдерін бір алаңға жинап, мәдени тәжірибе алмасуға жағдай жасады.
Өңір басшысы Олжас Нұрғалиев этноқалашықты аралап, өңірде тұратын түрлі халықтардың мәдениеті мен ұлттық тағамдарымен танысты. Ол әртүрлі этнос өкілдерімен еркін әңгімелесіп, олардың дәстүрлері мен ұлттық асханасының ерекшеліктері туралы сұрады. Өз сөзінде мұндай іс-шаралар халықтар арасындағы достық пен өзара түсіністікті нығайтатынын атап өтті.
Өткізілген іс-шаралар қорытындысы бойынша бас жүлдені Қостанай ауданының Балалар шығармашылық үйі жеңіп алды. Ұжым қазақ халқының бай мәдениетін, оның ішінде тазы және бүркітпен аңшылық дәстүрін, сондай-ақ ұлттық тағамдардың алуан түрлілігін кеңінен таныстырды.
Бірінші орынды Тобыл қаласының мектеп-гимназиясы иеленсе, екінші орын Тобыл қаласының №1 жалпы білім беретін мектебіне бұйырды, ал үшінші орынды Қостанай ауыл шаруашылығы колледжі жеңіп алды.
Мерекелік концерт шараның көркін қыздырды. Сахнада Қостанайлық танымал өнерпаз Арыстан Құрманов және Қостанай ауданының талантты орындаушылары өнер көрсетті. Олардың өнері түрлі ұлт пен мәдениет өкілдерін біріктіріп, қуаныш пен бірлік атмосферасын сыйлады.
Ақпарат көзі : https://www.gov.kz/memleket/entities/kostanai-kostanai-audany-akimat/press/news/details/1215256?lang=kk
Жауап қалдыру