Қазақстан жоғары білікті шетелдік мамандарды тартудың жаңа тетіктерін іске қосуда. Тиісті шаралар таланттар, инвесторлар мен кәсіпкерлер үшін елдің ашықтығын арттыруға бағытталған Қазақстан Республикасы Президентінің Жарлығы шеңберінде іске асырылуда.
Еңбек және халықты әлеуметтік қорғау министрлігі көші-қон заңнамасын кешенді жаңартуды көздейтін заң жобасын әзірледі. Құжат еңбек нарығының нақты қажеттіліктерін ескере отырып, сұранысқа ие мамандарды нысаналы түрде тарту тетігін енгізеді. Негізгі жаңашылдық Үкімет бекітетін басым кәсіптер тізбесін қалыптастыру болмақ. Оған, күтіліп отырғандай, ақпараттық технологиялар, денсаулық сақтау, білім беру және мәдениет салаларындағы мамандар кіреді – бұл бүгінгі таңда кадр тапшылығы ең көп байқалатын бағыттар.
Заң жобасы сондай-ақ жұмыс берушілердің шақыруы бойынша шетелдік мамандарды тартудың түсінікті және ашық шарттарын белгілейді.
Қазақстанда жұмыс істеу және өмір сүру үшін бәсекеге қабілетті жағдайлар жасауға жеке назар аударылған.
Атап айтқанда, «Алтын Visa» бағдарламасының мүмкіндіктері кеңейтіледі. Шетелдік мамандар белгіленген еңбек қызметі кезеңінен кейін ұзақ мерзімді резидент мәртебесін (Resident ID) алуға үміткер бола алады.
Бұл мәртебе бірқатар елеулі артықшылықтарға, соның ішінде салықтық преференцияларға, қаржылық қызметтерге қол жеткізуге, денсаулық сақтау және білім беру салаларындағы кеңейтілген мүмкіндіктерге, сондай-ақ квоталық шектеулерден тыс жұмыс істеу құқығына жол ашады.
Осы нормаларды іске асыру, ең алдымен, шетелдік мамандарды тарту арқылы қазақстандық жұмыскерлерге білім мен дағдыларды беруді қамтамасыз етеді, сонымен қатар кадр тапшылығын жабуға және технологиялық дамуды жеделдетуге көмектеседі, бұл жалпы алғанда өнімділікті арттырып, оң экономикалық әсер қалыптастырады.
Ұзақ мерзімді перспективада мұндай шаралар Қазақстанның білікті мамандар мен озық технологияларды тартатын өңірлік орталыққа айналуына ықпал етуі мүмкін.
Қазіргі уақытта заң жобасы ведомствоаралық келісуден өтуде.
Сонымен қатар, Еңбек және халықты әлеуметтік қорғау министрлігі Қазақстан Республикасы Үкіметінің қаулысы деңгейінде бекітілетін сұранысқа ие кәсіптер тізбесін 51-ден 174-ке дейін кеңейту бойынша жұмыс жүргізуде.
Тізбеге атом өнеркәсібінде, энергетикада, биотехнологияда және геномдық медицинада, денсаулық сақтауда, ядролық энергетикада, су ресурстары мен ирригацияда және т.б. сұранысқа ие кәсіптер кіреді.
Қабылданған шаралар Қазақстанның таланттар үшін жаһандық бәсекедегі позициясын күшейтіп, экономиканың негізгі салаларына білікті мамандардың келуін қамтамасыз етеді деп күтілуде.
Ақпарат көзі : https://www.gov.kz/memleket/entities/kostanai-enbek/press/news/details/1218476?lang=kk
Жауап қалдыру