Мойынқұм аудандық білім бөлімінің ұйымдастыруымен «Ана – отбасының жүрегі, мейірімділік тірегі» атты аудандық аналар форумы жоғары деңгейде ұйымдастырылып өтті. Тағылымы мол басқосу қоғамдағы отбасы құндылықтарын дәріптеуге, аналардың мәртебесін арттыруға және жас ұрпақ тәрбиесіндегі ананың ерекше рөлін кеңінен насихаттауға арналды.
Форумға ауданның ардақты аналары, әжелер, білім саласының ардагерлері, мектеп директорлары, ұстаздар, ата-аналар мен жастар қатысып, ұлттық тәрбие мен рухани құндылықтар төңірегінде өзара пікір алмасты. Іс-шара барысында отбасы институтын нығайту, бала тәрбиесіндегі жауапкершілік, қыз баланың ибалығы мен тәрбиесі, әже мектебінің өнегесі және ұлт болашағын тәрбиелеудегі ананың орны туралы мазмұнды баяндамалар жасалды.
Шара барысында сөз алған спикерлер қазақ халқының сан ғасырлық тәлім-тәрбиесінің негізі – отбасындағы сыйластық пен ананың ақыл-парасаты екенін атап өтті. Сонымен қатар, қазіргі қоғамдағы тәрбие мәселелері қозғалып, ұлттық құндылықтарды жас ұрпақтың бойына сіңіру жолдары кеңінен талқыланды.
Форум аясында мектеп ұстаздары мен көпбалалы аналар, қоғам белсенділері өз тәжірибелерімен бөлісіп, жастарға тағылымды ой-пікірлерін жеткізді. Қатысушылар тәрбиенің негізі – мейірім мен адамгершілік екенін айтып, отбасындағы татулық пен ата-ана өнегесінің маңыздылығына ерекше тоқталды.
Іс-шараның мазмұнын ашқан сахналық қойылымдар мен концерттік бағдарламалар көрермен көңілінен шықты. Білім беру ұйымдарының оқушылары мен ұстаздары орындаған патриоттық әндер, ұлттық билер және тәрбиелік мәні зор көріністер форумның тәрбиелік маңызын арттыра түсті.
Сонымен қатар, форум аясында ұлттық салт-дәстүрлер мен қазақы тәлім-тәрбие көріністері насихатталып, аналардың қоғамдағы беделі мен еңбегіне құрмет көрсетілді. Жиын барысында отбасы құндылықтарын дәріптеуге үлес қосып жүрген бірқатар белсенді аналар мен ұстаздар арнайы марапатталды.
Тағылым мен тәрбиені ұштастырған мазмұнды кездесу қатысушыларға ерекше әсер сыйлап, ұрпақ тәрбиесіне бағытталған маңызды пікір алаңына айналды. Форум соңында аналар қауымына алғыс айтылып, отбасы берекесін сақтаудағы еңбектеріне жоғары баға берілді.
Ақпарат көзі : https://www.gov.kz/memleket/entities/zhambyl-moyynkum/press/news/details/1219738?lang=kk
Жауап қалдыру