Ақмола облысында қысқа уақыт таныс болған әйелге сенген Зеренді ауданының тұрғындары зардап шеккен алаяқтықтың кезекті фактісі тергелуде.
Ағымдағы жылдың 14 мамырында аудандық полиция бөліміне жергілікті тұрғын – оқытушы келіп, Астана қаласынан жылжымайтын мүлік сатып алмақ болып көп ақша жоғалтқанын хабарлады.
Полицейлердің анықтамасы бойынша, зардап шегуші мен болжамды алаяқтың танысуы кездейсоқ жағдайларда – ортақ танысының жерлеу рәсімінде болған. Әңгіме барысында ерлі-зайыптылар елордада үй сатып алуды көптен армандағанын айтқан. Мұны естіген әйел бірден өзінің көмегін ұсынып, жылжымайтын мүлікті “өте жақсы бағамен” таңдап ұсына алатынына сендірген.
Телефон нөмірлерімен алмасып, байланыс одан әрі жалғасқан. Арада біраз уақыт өтіп, жаңа таныс қолайлы үй тапқанын айтып, жұбайларды Астанаға көруге шақырды. Көргендері жәбірленушілерді сендіргені соншалық, олар несие ресімдеп, мәмілені ресімдеу үшін әйелге 7 миллион теңге берген.
Алайда, ақшаға ие болған әйел қоңыраулар мен хабарламаларға жауап беруді тоқтатқан. Алдаудың құрбаны болғанын түсінген ерлі-зайыптылар полицияға жүгінді.
Жедел-іздестіру іс-шаралары барысында полиция қызметкерлері күдіктінің жеке басын анықтады. Ол Қарағанды қаласының 61 жастағы тұрғыны болып шықты. Қазіргі уақытта оның алаяқтық фактісіне қатысы тексерілуде.
Полицейлер тағы да азаматтарды жылжымайтын мүлікпен мәмілелер жасау кезінде өте сақ болуға шақырады. Бейтаныс адамдарға, тіпті олар сенім тудырса да, үлкен соманы сеніп тапсырмаңыз. Кез-келген қаржылық операциялар тек ресми түрде жүргізілуі керек, құжаттарды міндетті түрде тексеріп, мәмілені заңды түрде сүйемелдеу керек.
Ақпарат көзі : https://www.gov.kz/memleket/entities/mvd-akmola/press/news/details/1222666?lang=kk
Жауап қалдыру