Қазақстан Республикасы Еңбек және халықты әлеуметтік қорғау министрлігі Көші-қон комитетінің төрағасы Э. Кузенбаев БҰҰ Халықаралық көші-қон ұйымының (МОМ) өкілдерімен Zoom форматында онлайн кездесу өткізді. Кездесу Қазақстан Республикасының Президенті Жарлығының көші-қон саясатын жетілдіруге бағытталған ережелерін іске асыру және түсіндіру мәселелеріне арналды.
Кездесу барысында көші-қон саясатын дамыту, білікті мамандарды, инвесторлар мен кәсіпкерлерді тарту бойынша бірлескен жұмыс мәселелері, сондай-ақ мүдделі мемлекеттік органдар, халықаралық әріптестер, сараптамалық қоғамдастық және бизнес арасында Жарлық ережелерін ақпараттық-түсіндіру жұмыстарының тетіктері талқыланды.
Ерекше назар көші-қонды басқарудың заманауи халықаралық тәсілдеріне, көші-қон процестерін цифрландыру мәселелеріне, еңбек нарығын талдау құралдарын дамытуға және жасанды интеллект элементтерін қоса алғанда инновациялық шешімдерді еңбек мобильділігін реттеу жүйесіне енгізуге аударылды.
МОМ өкілдері Қазақстан тарапынан қабылданып жатқан шаралардың ашық әрі бәсекеге қабілетті көші-қон жүйесін құрудағы маңызын атап өтті, бұл қазіргі жаһандық үрдістерге және экономиканың қажеттіліктеріне сәйкес келеді.
Кездесу қорытындысы бойынша тараптар ынтымақтастықты одан әрі нығайтуға, соның ішінде бірлескен іс-шаралар, сараптамалық консультациялар және Қазақстан Республикасының көші-қон саясатын іске асыру бойынша түсіндіру жұмыстарын жүргізуге дайын екендігін растады.
Ақпарат көзі : https://www.gov.kz/memleket/entities/kqon/press/news/details/1224705?lang=ru
Жауап қалдыру