Алматының Наурызбай ауданында 240 орынға арналған жаңа балабақшаның құрылысы аяқталды. Бұл туралы Алматы қаласы Құрылыс басқармасының өкілдері айтты.
Заманауи әлеуметтік инфрақұрылым нысаны Қарағайлы өзенінің батыс жағында орналасқан. Жақын уақытта балабақша қаланың коммуналдық меншігіне беріледі.
Екі қабатты ғимарат 10 топқа есептелген. Мектепке дейінгі мекеменің ашылуы ауданның қолданыстағы балабақшаларына түсетін жүктемені азайтуға мүмкіндік береді. Сонымен қатар 40-тан астам тұрақты жұмыс орны ашылады.
Балабақшада балалардың жайлы болуы мен жан-жақты дамуына барлық жағдай жасалған. Негізгі білім беру бағдарламасымен қатар, тәрбиеленушілер үшін гимнастика, музыка және би үйірмесі ұйымдастырылады.
Қауіпсіздік мәселесіне ерекше назар аударылған. Инженерлік жүйелер мен техникалық жабдықтар балалар аймағынан оқшауланған бөлек жертөле бөлмесінде орналастырылған. Сондай-ақ кіреберіс бөлігінде жүріп-тұруы шектеулі азаматтарға қолайлы жағдай қарастырылған.
«Жобалау кезінде қауіпсіздікке, қолайлылыққа және балалар үшін жайлы орта қалыптастыруға ерекше басымдық берілді. Қазіргі уақытта нысанды қаланың коммуналдық меншігіне беру үшін қажетті құжаттарды рәсімдеу жұмыстары жүргізілуде. Барлық рәсім аяқталғаннан кейін балабақша алғашқы тәрбиеленушілерін қабылдайды», — деді Алматы қаласы Құрылыс басқармасының өкілдері.
Ақпарат көзі : https://www.gov.kz/memleket/entities/almaty/press/news/details/1225634?lang=ru
Жауап қалдыру