1 мамыр — Қазақстан халқының бірлігі күні — мемлекеттік мерекелер күнтізбесінде ерекше орын алатын айтулы күн. Бұл мереке тарихи қалыптасқан мәдениеттер мен дәстүрлердің сан алуандығын ғана емес, сонымен қатар қоғамдық келісімнің, өзара құрмет пен толеранттылықтың берік негізін білдіреді. Бұл құндылықтар ұлттық болмысымыздың ажырамас бөлігіне айналды. Аталған күн елімізде тұратын жүз елуден астам ұлт өкілдерін бір шаңырақ астына топтастырып, оны шынайы достықтың, өзара түсіністіктің және жасампаздықтың орталығына айналдырады.
Біздің ауданда Қазақстан халқының бірлігі күнін мерекелеу дәстүрлі түрде жарқын, ауқымды әрі ерекше жылылықпен өтті. Орталық алаң тұрғындар мен қонақтардың бас қосатын орнына айналып, мұнда қуаныш, ашықтық және шынайы қарым-қатынас атмосферасы орнады. Ән мен күйге, би мен өнерге толы мерекелік концерт көрермендерге көтеріңкі көңіл-күй сыйлап, күннің басты көркіне айналды.
Мерекелік көңіл-күйді аудан бөлімдері мен ауылдық округтер ұйымдастырған сауда қатарлары мен тақырыптық көрмелер одан әрі айшықтай түсті. Қонақтар түрлі ұлттардың мәдени мұрасымен танысып, дәстүрлі тағамдардан дәм татты, сәндік-қолданбалы өнер туындыларын тамашалап, ұлттық киімдердің көркемдігін көрді. Түрлі-түсті киімдер мен алуан түрлі тағамдар көздің жауын алып қана қоймай, Қазақстан мәдениетінің қаншалықты бай әрі көпқырлы екенін көрсетті. Алаңның әрбір бұрышы бейбітшілік пен келісім идеясына үндейтін өзіндік бір тарихты баяндап тұрғандай әсер қалдырды.
Мереке барысында аудан әкімі Рүстем Мұқашұлы Елубаев тұрғындар мен қонақтарды құттықтап, ізгі тілегін жеткізді. Ол өз сөзінде Қазақстан халқының бірлігі күні қазіргі мемлекеттің негізгі құндылықтарын айқындайтын маңызды қоғамдық-саяси мереке екенін атап өтті. Бұл күн әрдайым еліміздегі тұрақтылық пен өркендеудің негізі болып келген ынтымақ пен өзара құрметтің символы екенін ерекше айтты.
Аудан әкімі сондай-ақ Ұлы дала тарихына сүйене отырып, Қазақстанның унитарлы мемлекет ретінде дамуын жалғастырып, аумақтық тұтастығын нығайтып келе жатқанын атап өтті. «Әділетті Қазақстан» тұжырымдамасы мен «Заң мен Тәртіп» қағидаты негізінде елдің алға нық қадам басып келе жатқанын жеткізді. Оның айтуынша, бірлік пен ортақ күш-жігер ғана стратегиялық мақсаттарға қол жеткізіп, халықтың әл-ауқатын арттыруға мүмкіндік береді.
Сонымен қатар, өз сөзінде ол «Таза Қазақстан» идеологиясының маңыздылығына тоқталып, оның қоршаған ортаға ұқыпты қарау мәдениетін қалыптастыруға, экологиялық сананы дамытуға және өмір сүруге қолайлы орта құруға бағытталғанын айтты. Бұл бастама әрбір азаматтың белсенді қатысуын талап ететін ортақ іс екені де ерекше атап өтілді.
Сөз соңында Рүстем Мұқашұлы ұлы ойшыл Абай Құнанбайұлының «Бірлік – ақылға бірлік» деген қанатты сөзін келтіріп, оның бүгінгі күнде де өзектілігін жоғалтпағанын жеткізді. Ол барша аудан тұрғындарына зор денсаулық, бақ-береке, әр шаңыраққа бейбітшілік пен татулық тіледі.
Салтанатты шара ауданның дамуына елеулі үлес қосып жүрген азаматтарды марапаттау рәсімімен жалғасты. Қоғамдық-саяси өмірге белсенді қатысып, ортақ іске үлес қосқан бірқатар азаматтар Қазақстан Республикасы Президентінің Алғыс хатымен марапатталды.
Марапатталғандардың қатарында аудандық мәслихат төрағасы Мағжан Рамазанұлы Жүсіпбеков, «Altyn Jer Agro» ЖШС директоры Жарас Абайханұлы Жағыпаров, «Айгөлек» балабақшасының меңгерушісі Сәуле Айдарбекқызы Ахметова, «AMANAT» партиясының атқарушы хатшысы Ермек Серікұлы Қайыржанов, жеке кәсіпкер Надежда Михайловна Строкач, аудандық электр желілерінің басшысы Оксана Михайловна Киккаринова, аудандық аурухананың бас дәрігері Шолпан Қайыргелдіқызы Сәбитова, аумақтық референдум комиссиясының хатшысы Махамбет Махсұтұлы Жұмағұлов, аудан әкімі аппаратының бөлім басшысы Дәулет Ермұхаметұлы Ерғали және Кішіқараой ауылдық округінің әкімі Ботагөз Беймұханқызы Сабирова бар.
Қазақстан Республикасының жаңа Конституциясының жобасы бойынша жалпыұлттық референдумды ұйымдастыру және өткізу кезінде жоғары кәсібилік пен жауапкершілік танытқаны үшін Солтүстік Қазақстан облысы әкімінің Алғыс хатымен Жарас Абайханұлы Жағыпаров пен Май ауылдық округінің маманы Күлбаршын Әбдірахманқызы Нұрмағамбетова марапатталды.
Сонымен қатар, ауданның бірқатар белсенді азаматтары аудан әкімінің Құрмет грамоталары және Алғыс хаттарымен марапатталды. Бұл марапаттар олардың адал еңбегі мен бастамашылдығына, өңірдің әлеуметтік-экономикалық дамуына қосқан үлесіне берілген лайықты баға болды. Мұндай сәттер әрбір адамның қоғамдағы рөлінің маңызды екенін айқындай түседі.
Мерекелік іс-шаралар «Бір шаңырақ астында» атты фестивальмен жалғасын тапты. Бұл фестиваль еліміздегі түрлі ұлттардың мәдениеті мен дәстүрін кеңінен таныстыруға арналды. Қатысушылар ұлттық салт-дәстүрлерін, өнерін сахна төрінде паш етті. Әртүрлі тілдерде ән шырқалып, ұлттық билер орындалып, халықтық дәстүрлер көрсетілді.
Әрбір қойылым өзіндік ерекшелігімен дараланып, көрермендердің ыстық ықыласына бөленді. Ауданның шығармашылық ұжымдарының өнері мерекелік бағдарламаны толықтырып, оның мазмұнын байыта түсті.
Қатысушылардың өнерін аудандық ардагерлер кеңесінің төрағасы М.К. Жабин бастаған арнайы комиссия бағалады. Қазылар алқасы қатысушылардың жоғары деңгейде дайындалғанын, шығармашылық ізденісі мен мәдени мұраны насихаттаудағы еңбегін атап өтті.
Фестиваль қорытындысы бойынша «Көрермен көзайымы», «Өнер шеберлері», «Кәсіби шеберлік» сынды номинациялар бойынша жеңімпаздар анықталып, оларға дипломдар мен бағалы сыйлықтар табысталды. Қатысушылар көрермендердің зор қошеметіне ие болды.
Мерекенің қорытындысы ерекше әсерлі әрі мазмұнды өтті. Сахнада барлық қатысушылардың басын қосқан қорытынды ән мерекенің басты идеясын — бірлік пен татулықты айшықтай түсті. Ортақ әнді бірге орындау арқылы жұртшылықтың бойында елге деген мақтаныш сезімі арта түсті.
Қазақстан халқының бірлігі күні тағы да бір мәрте дәлелдеді: еліміздің басты күші — оның халқында. Бірлікті сақтап, дәстүрді құрметтеп, ортақ болашақты бірге құру — әрбір азаматтың міндеті. Бұл мереке бірліктің тек сөз емес, күнделікті еңбектің нәтижесі екенін еске салады.
Ақпарат көзі : https://www.gov.kz/memleket/entities/sko-akzhar/press/news/details/1224808?lang=ru
Жауап қалдыру