Дереккөз: https://youtu.be/NjGXVv7eg6A?si=pld0pQfZYWuvjKok
Қазіргі таңда Қазақстанда өндірістік жарақаттанудың негізгі себептері ретінде зардап шегушінің өрескел абайсыздығы, жұмысты ұйымдастырудың қанағаттанарлықсыз деңгейі, сондай-ақ еңбек қауіпсіздігі мен еңбекті қорғау талаптарының бұзылуы жиі кездеседі. Бұл көрсеткішті төмендету мақсатында еңбек қауіпсіздігі талаптарын түсіндіру бойынша тұрақты профилактикалық жұмыстар жүргізілуде. Сонымен қатар, жұмыскерлерді жазатайым оқиғалардан міндетті сақтандыру жүйесі тұрақты түрде жүзеге асырылып келеді. Бұдан бөлек, кәсіпорындарда жұмыс орындарын аттестаттау және кәсіптік тәуекелдерді идентификациялау арқылы қауіпті факторлардың алдын алу шаралары қабылдануда.
Жұмыс берушілердің еңбек қауіпсіздігі және еңбекті қорғау талаптарын сақтауын бақылау мемлекеттік еңбек инспекторлары тарапынан жүзеге асырылады. Алматы қаласы кәсіпорындарында жылына екі рет профилактикалық бақылау жүргізіледі. Бұл бақылау ұйымдарға тікелей бару арқылы өткізіліп, еңбек қауіпсіздігі, еңбекті қорғау талаптарының және еңбек заңнамасының сақталуы тексеріледі.
Егер тексеру барысында қандай да бір құқықбұзушылықтар анықталса, оларды жою үшін жұмыс берушіге орындауға міндетті нұсқама беріледі және оны орындау үшін нақты мерзім белгіленеді. Ал егер анықталған бұзушылық үшін әкімшілік жауапкершілік көзделсе, Қазақстан Республикасының Әкімшілік құқықбұзушылық туралы кодексіне сәйкес кәсіпкерлік субъектісінің санатына қарай әкімшілік айыппұл салынады. Сондықтан еңбек қауіпсіздігі талаптарын бұзған кәсіпорындарға қатысты қолданылатын шаралар жеткілікті деңгейде қатаң және міндетті сипатқа ие.
Қауіпті өндіріс орындарында цифрлық технологияларды енгізу еңбек қауіпсіздігін айтарлықтай жақсартуға мүмкіндік береді. Мысалы, «Алатау Жарық Компаниясы» АҚ қазіргі уақытта жұмыскерлердің зиянды және (немесе) қауіпті өндірістік факторлардан қорғануға арналған арнайы киім, арнайы аяқкиім, баскиім, қолғап және өзге де жеке қорғаныш құралдарын өндіріс орындарында дұрыс пайдалануын бақылайтын жасанды интеллект технологиясын енгізіп жатыр. Мұндай жүйе қауіпсіздік талаптарының сақталуын автоматты түрде бақылап, бұзушылықтарды жедел анықтауға мүмкіндік береді. Нәтижесінде бұл жазатайым оқиғалардың алдын алуға, адам факторынан туындайтын тәуекелдерді төмендетуге және еңбек қауіпсіздігін қамтамасыз ету тиімділігін арттыруға ықпал етеді.
Егер жұмыс орнында еңбек қауіпсіздігі талаптары сақталмаса, жұмыскер өз құқықтарын қорғау үшін еңбек заңнамасының бұзылуы, еңбек қауіпсіздігі талаптарының сақталмауы немесе жазатайым оқиғалардың орын алуы бойынша еңбек жөніндегі уәкілетті органға ресми түрде арызбен жүгіне алады. Осы негізде мемлекеттік еңбек инспекторлары тиісті тексеру жұмыстарын жүргізеді.
Сонымен қатар, еңбек инспекциясы жедел әрекет ететін қызмет немесе шұғыл көмек көрсету органы болып табылмайды, сондықтан арнайы жедел желі қарастырылмаған. Ал анонимді шағым беру мүмкіндігі заңнамада көзделмеген, себебі бұл Қазақстан Республикасының Әкімшілік рәсімдік-процестік кодексінің талаптарына қайшы келеді. Яғни мемлекеттік органдарға өтініштер өтініш берушінің деректері көрсетіле отырып берілуі тиіс.
Ақпарат көзі : https://www.gov.kz/memleket/entities/almaty-enbek/press/news/details/1225226?lang=ru
Жауап қалдыру