Бүгін, 22 мамыр күні таңертең қаладағы көпқабатты үйлердің бірінде соңы сәтті аяқталған нағыз драма орын алды.
Сағат 07:55-те «102» операторының пультіне шұғыл қоңырау түсті: Айманов көшесі, 36 мекенжайындағы көпқабатты үйдің шатырында төменге секіруге дайын тұрған қыз бар екені хабарланды. Оқиға орнына бірден батальонның автопатруль экипажы — Максат Иманбек пен Дархан Сәрсембаев келді.
— «Мен ешкімге керек емеспін!» деп айқайлады қыз біз келген кезде. Шатырға көтерілгенде, шатырдың дәл шетінде отырып жылап отырған қызды көрдік. Ол енді өмір сүргісі келмейтінін айтты. Сол сәтте әр секунд шешуші болды, дереу әрекет ету қажет еді, — деп еске алады Павлодар қалалық ПБ патрульдік полиция батальоны қызметінің инспекторы Максат Иманбек.
Инспектор бірден қызбен сөйлесіп, оның назарын басқаға аударып, тыныштандыруға тырысты. Қызды қорқытып алмау және құлап кетуіне себеп болмау үшін ыңғайлы сәтті күткен полицейлердің бірі алға ұмтылып, қызды берік ұстап қалды.
Кейін 19 жастағы Даяна соңғы уақытта ауыр депрессиядан зардап шеккенін, дәл осы жағдай оны осындай шарасыз қадамға итермелегенін мойындады. Қазір онымен білікті психологтар жұмыс істеп жатыр, өміріне ешқандай қауіп төніп тұрған жоқ.
Полицейлердің өздері бұл туралы қарапайым ғана айтты: «Адамдарды құтқару, көмектесу және қайғылы жағдайлардың алдын алу — біздің жұмысымыз».
Полицейлер маңызды ескерту жасады: Тығырықтан шығатын жол әрқашан бар! Егер сіз немесе жақындарыңыз психологиялық қиындықтарға, депрессияға немесе ауыр өмірлік жағдайға тап болса, үндемей қалмаңыз. Сіз әрдайым полицияға жүгіне аласыз немесе 111 бірыңғай сенім телефонына қоңырау шала аласыз. Сізге міндетті түрде көмектеседі.
Ақпарат көзі : https://www.gov.kz/memleket/entities/mvd-pavlodar/press/news/details/1226547?lang=ru
Жауап қалдыру