Абай облысы Полиция департаментінің кинологиялық қызмет орталығы бүгін ең тәжірибелі төрт аяқты қызметкерлердің бірі — Джон есімді қызметтік итті құрметті демалысқа шығарып салды.
8 жыл 7 айлық қызметі барысында Джон түрлі сипаттағы 160 қылмыстың ашылуына қатысып, із-түзсіз жоғалған 51 адамды табуға көмектесті.
Оның қызметі — тәулігіне ондаған шақыртуға шығу, іздестіру жұмыстары, арнайы операциялар және кинолог серігі полиция старшинасы Олжас Тұрсынхановпен бірге жүріп өткен сансыз шақырым жол.
Кинологиялық қызмет қызметкерлері үшін Джон әлдеқашан жай ғана қызметтік ит емес еді.
Ол ізді мүлтіксіз табатын, қауіпті сезетін және тапсырманы соңына дейін орындайтын команданың толыққанды мүшесіне айналды.
Бүгінгі қоштасу рәсімі ерекше әсерлі өтті.
Қызметі ресми түрде аяқталғаннан кейін Джонның кинологы серігінен айырылмай, оны үйіне алып кетуге шешім қабылдады.
Полицейдің айтуынша, тоғыз жылға жуық бірге қызмет атқарған досын тастап кетуге оның жүрегі дауаламаған.
Ал Джон мұны бірден түсінгендей болды.
Қоштасу кезінде қызметтік ит жетекшісінен бір елі ажырамай, оған еркелеп жақындап, құйрығын қуана бұлғаңдатып тұрды. Ол қызмет аяқталғанымен, өміріндегі ең маңызды адамның жанында қалатынын сезгендей еді.
Полиция қызметкерлерінің айтуынша, қызметтік иттер күн сайын ішкі істер органдары қызметкерлерімен қатар күрделі міндеттерді атқарады — қылмыстарды ашуға қатысады, адамдарды іздейді, күдіктілерді ұстауға көмектеседі және қоғамдық қауіпсіздікті қамтамасыз етеді.
Джонның оқиғасы — тек қызмет туралы ғана емес.
Бұл — адалдық, сенім және жылдар бойы үнсіз бірге із кесіп жүрген адам мен жануар арасындағы ерекше байланыс туралы хикая.
Ақпарат көзі : https://www.gov.kz/memleket/entities/mvd-abay/press/news/details/1226919?lang=ru
Жауап қалдыру