Инвесторлардың құқықтарын қорғау комитетінде Пәкістан Ислам Республикасының Гуджрат қаласы Сауда-экономикалық палатасының делегациясымен (Gujrat Chamber of Commerce and Industry) кездесу өтті. Делегация өкілдері Қазақстанды инвестиция салу үшін әлеуетті бағыт ретінде қарастырады.
Шетелдік делегация сапарының мақсаты – іскерлік байланыс орнату, екіжақты ынтымақтастықтың перспективаларын талқылау, сондай-ақ Қазақстанның инвесторлардың құқығын қорғау және инвестициялық ахуалды жақсарту саласындағы тәжірибесін зерделеу.
Кездесуде Комитет өкілдері пәкістандық тарапты өз қызметінің негізгі бағыттарымен, инвесторлардың құқықтары мен заңды мүдделерін қорғау тетіктерімен, сондай-ақ туындаған мәселелерді жедел шешу мақсатында мемлекеттік органдар және бизнес-қоғамдастықпен өзара іс-қимыл жасау құралдарын таныстырды.
Қазақстанның инвестициялық тартымдылығын арттыру және шетелдік инвесторлардың сенімін нығайту, бизнес жүргізу үшін қолайлы жағдай жасауға ерекше назар аударылды.
Гуджрат қаласының Сауда-өнеркәсіп палатасының өкілдері қазақстандық ұйымдармен серіктестік байланыстарды дамытуға қызығушылық білдіріп, кәсіпкерлікті қолдау және инвестиция тарту саласындағы тәжірибе алмасудың маңыздылығын атап өтті.
Ақпарат көзі : https://www.gov.kz/memleket/entities/kzpi/press/news/details/1237713?lang=ru
Жауап қалдыру