Семей қаласында Alikhan Bokeikhan University мен Абай облысының Полиция департаменті бірлесіп жүзеге асырып келе жатқан дуалды білім беру бағдарламасының кезекті оқу жылы қорытындыланды.
Университет пен полиция арасындағы ынтымақтастық 2019 жылы басталып, бүгінде теория мен тәжірибені ұштастыру арқылы болашақ құқық қорғау органдары қызметкерлерін даярлаудың табысты үлгілерінің біріне айналды.
Іс-шараны ашқан Абай облысы Полиция департаменті бастығының орынбасары полиция полковнигі Елдос Закимов университет басшылығына сенім, қолдау және ішкі істер органдары үшін білікті кадрлар даярлауға қосқан үлесі үшін алғыс білдірді.
Бағдарлама аясында заң факультетінің «Жас процессуалист» клубының жұмысына ерекше көңіл бөлінеді. Жыл сайын клуб қатарына қосылатын студенттер тергеушілердің жанында тәжірибеден өтіп, қызметтің ерекшеліктерімен танысады және нақты кәсіби міндеттерді шешуге қатысады.
2025–2026 оқу жылының қорытындысы бойынша бағдарламаның ең белсенді әрі жауапты қатысушылары алғыс хаттармен және ынталандыру сыйлықтарымен марапатталды.
Бүгінде Абай облысы Полиция департаменті тергеушілерінің 38 пайызы — Alikhan Bokeikhan University түлектері. Олардың көпшілігі қызметін табысты жалғастырып келеді, ал кейбірі басшылық лауазымдарға дейін көтерілген.
Студенттер алдында университеттің түлектері болып табылатын полиция қызметкерлері сөз сөйледі. Олар өздерінің кәсіби жолдары туралы айтып, тәжірибелерімен бөлісті және болашақ әріптестерін қиындықтардан қорықпауға, білімдерін үнемі жетілдіруге, сондай-ақ полициядағы қызметтің басты мақсаты — адамдарға көмектесу мен заңдылықты қорғау екенін ұмытпауға шақырды.
Дуалды білім беру бағдарламасы алдағы уақытта да жалғасады. Себебі ол бүгінде нақты нәтижелер көрсетіп, ішкі істер органдары жүйесі үшін сұранысқа ие мамандар даярлауға тиімді үлес қосып отыр.
Ақпарат көзі : https://www.gov.kz/memleket/entities/mvd-abay/press/news/details/1236421?lang=ru
Жауап қалдыру