Павлодар облысында полицейлер өрт кезінде тұрғындарды эвакуациялауға көмектесті.
Екібастұз қаласында полиция қызметкерлері көпқабатты тұрғын үйде болған өрт кезінде жедел әрекет етіп, тұрғындардың қауіпсіздігін қамтамасыз етуге көмектесті.
Демалыс күні полиция қызметкері Ернұр Қабдуахит Бауыржан Момышұлы көшесіндегі тұрғын үйлердің бірінен шыққан қою түтін мен өртті байқап, дереу төтенше жағдай қызметтеріне хабар берген. Сонымен қатар оқиға орнына жақын маңдағы полиция автопатрулі мен өрт сөндіру бөлімшелерін шақырған.
Оқиға орнына алғашқы болып учаскелік полиция инспекторы Бекзат Кишов жетіп, әріптестерімен бірге аумақты қоршауға алып, тұрғындарды эвакуациялау жұмыстарын ұйымдастырды.
Қатты түтінге байланысты екінші және үшінші қабаттағы бірнеше тұрғын өздігінен сыртқа шыға алмаған. Осыған байланысты полиция қызметкерлері Асылжан Наурызбаев, Дархан Қанаш және Темірлан Шадров түтін басқан қабаттарға көтеріліп, тұрғындарды қауіпсіз жерге шығаруға көмектесті.
Кейін оқиға орнына жеткен өрт сөндіру қызметінің бөлімшелері жалынды ауыздықтау жұмыстарын жүргізді. Полицейлер мен құтқарушылардың үйлесімді әрі жедел әрекеттерінің нәтижесінде тұрғындар дер кезінде эвакуацияланып, өрттің одан әрі таралуына жол берілмеді.
Қабылданған шаралардың арқасында төтенше жағдай толық бақылауға алынып, азаматтардың қауіпсіздігі қамтамасыз етілді.
Ақпарат көзі : https://www.gov.kz/memleket/entities/qriim/press/news/details/1236347?lang=ru
Жауап қалдыру