Екібастұз қаласында жылдың басты жүгіру жарысы – Ekibastuz Half Marathon RWS RUN 2026ұйымдастырылып, оған спорт пен салауатты өмір салтын ұстанатын 3000-нан астам адам қатысты. 5, 10 және 21 шақырымдық қашықтықтарға өткен жарысқа ҚР ІІМ «Арлан» спорт клубының атынан полиция қызметкерлері де қатысты.
Ауқымды спорттық шара әртүрлі жастағы қатысушыларды жинап, олар өз мүмкіндіктерін түрлі қашықтықтарда сынады. Жарыс спорттың, сергектіктің және бірліктің мерекесіне айналды.
Іс-шара барысында азаматтардың қауіпсіздігін қамтамасыз ету және қоғамдық тәртіпті сақтау мақсатында Екібастұз қаласы Полиция басқармасының қызметкерлері жұмылдырылды. Полицейлер қатысушылар мен көрермендердің қауіпсіздігін қамтамасыз етіп, жарыс бағыты өтетін аумақтарда жол қозғалысын реттеді және қоғамдық тәртіпті қадағалады.
Жарыс қорытындысы бойынша 10 шақырымдық қашықтықта полиция подполковнигі Асель Абдраманова екінші орынға ие болды. Ал ішкі істер органдарының ардагері Қанат Шакуов үздік бес жүгірушінің қатарына енді.
Полиция қызметкерлері мен ұйымдастырушылардың үйлесімді жұмысының арқасында марафон жоғары деңгейде ұйымдастырылып, ешқандай оқыс оқиғасыз өтті. Қатысушылар мен қонақтар жарыстың ерекше атмосферасын қауіпсіз әрі жайлы жағдайда сезіне алды.
Осындай іс-шараларды өткізу бұқаралық спортты дамытуға, халық денсаулығын нығайтуға және өңір тұрғындары арасында белсенді өмір салтын қалыптастыруға ықпал етеді.
Ақпарат көзі : https://www.gov.kz/memleket/entities/mvd-pavlodar/press/news/details/1236497?lang=ru
Жауап қалдыру