Ақсу өңірінде балалардың жазғы демалысын тиімді ұйымдастыру, сауықтыру және бос уақытын мазмұнды өткізу бағытындағы жұмыстар жүйелі түрде жүзеге асырылуда. Биыл өңірдегі 10 815 оқушының 9 151-і немесе 84 пайызы түрлі демалыс, сауықтыру және жұмыспен қамту шараларына қатысады.
Жазғы маусымда 25 мектеп жанындағы лагерь жұмыс істеп, онда 4 040 бала демалады. Сонымен қатар бір киіз үй лагері, екі шатырлы лагерь, екі IT-лагерь ұйымдастырылған. Балалардың заманауи технологияларға қызығушылығын арттыру мақсатында жасанды интеллект, робототехника және медиа бағытындағы жобалар іске асырылуда.
Жазғы демалыс кезеңінде балалар үшін «Smart Summer – Білім әлемі», «AI Kids: Миыңды шыңда», «Эко-әлемге саяхат», «Жас сарбаз – Expedition», «Blogger Camp», «Экотехно жаз» секілді жобалар ұсынылып, олардың шығармашылық, зияткерлік және техникалық қабілеттерін дамытуға мүмкіндік жасалуда.
Сондай-ақ оқушылар үшін экскурсиялық сапарлар ұйымдастырылып, қасиетті тарихи орындарға және Павлодар қаласындағы музейлерге бару жоспарланған. «Балдаурен» және «Жасдәурен» сауықтыру орталықтарында да балалардың демалысы қамтылмақ.
Бүгінгі таңда Ақсу өңіріндегі жазғы демалыс жобаларымен 8 817 бала қамтылып отыр. Балалардың қауіпсіз, қызықты әрі пайдалы демалысын ұйымдастыруға бағытталған жұмыстар жаз бойы жалғасады.
Ақпарат көзі : https://www.gov.kz/memleket/entities/pavlodar-edu/press/news/details/1242937?lang=ru
Жауап қалдыру