Жетісу облысында Халықаралық көші-қон ұйымының (ХКҰ) және Швейцарияның даму және ынтымақтастық агенттігінің (SDC) қолдауымен шетелде еңбек қызметін жүзеге асыруды жоспарлап отырған Қазақстан Республикасы азаматтарының қауіпсіздігі мен ақпараттық сауаттылығын арттыруға бағытталған Көші-қон алдындағы дайындық орталығының (Pre-departure Orientation Centre, PDO) ашылу рәсімі өтті.
Орталық облыстың Еңбек мобильділігі орталығының базасында құрылып, әлеуетті еңбек мигранттарына кешенді ақпараттық-консультациялық қолдау көрсететін алаңға айналады. Орталық қызметінің негізгі мақсаты – азаматтардың құқықтары мен міндеттері, шетелде жұмысқа орналасу ерекшеліктері, сондай-ақ заңсыз көші-қонмен байланысты тәуекелдер туралы хабардарлық деңгейін арттыру арқылы қауіпсіз, ұйымдасқан және заңды еңбек көші-қонына жәрдемдесу.
Орталық жұмысы аясында азаматтар шетелде жұмысқа орналасу, құқықтық және қаржылық сауаттылық, жаңа өмір сүру және еңбек жағдайларына бейімделу, сондай-ақ халықаралық еңбек нарығында табысты интеграциялануға қажетті практикалық дағдыларды дамыту мәселелері бойынша консультациялар ала алады.
Көші-қон алдындағы дайындық орталығының құрылуы мемлекеттік көші-қон саясатын іске асырудағы маңызды қадам болып табылады және Қазақстан Республикасының азаматтардың шетелдегі құқықтары мен мүдделерін қорғау, адами капиталды дамыту және қауіпсіз еңбек көші-қонын қамтамасыз ету жөніндегі басымдықтарына толық сәйкес келеді.
Ашылу рәсіміне облыс әкімінің орынбасары, мемлекеттік органдардың, халықаралық ұйымдардың және серіктес құрылымдардың өкілдері қатысты. Олардың қатарында Қазақстандағы БҰҰ-ның Тұрақты үйлестірушісі Сарангоо Раднаарагчаа, Қазақстандағы Швейцария Елшілігінің уақытша сенімді өкілі Помпилио Джорджо, сондай-ақ Қазақстандағы Халықаралық көші-қон ұйымы (ХКҰ) миссиясының басшысы Серхан Актопрак болды.
Ақпарат көзі : https://www.gov.kz/memleket/entities/zhetysu-social-employment/press/news/details/1244114?lang=ru
Жауап қалдыру