СҚО-да ДСП және ЛДСП шығаратын заманауи зауыт салынып жатыр

Солтүстік Қазақстан облысында өңірдегі ең ірі инвестициялық жобалардың бірі іске асырылуда. Заманауи ағаш өңдеу кешенінің құрылысы барысын облыс әкімінің орынбасары Қанат Дүзелбаев пен «Ultradecor Trading Kazakhstan» ЖШС басшылығы талқылады.

Жоба «Qyzyljar» арнайы экономикалық аймағының аумағында жүзеге асырылып жатыр. Ол ағаш-жоңқа тақталары мен ламинацияланған ағаш-жоңқа тақталарын өндіретін заманауи өндіріс құруды көздейді. Бірінші кезеңдегі инвестиция көлемі 70 млрд теңгені құрайды.

Кездесу барысында компания өкілдері жобаның іске асырылу барысы туралы мәлімдеді. Бүгінгі таңда технологиялық жабдықтардың шамамен 50 пайызы сатып алынған. Қазіргі уақытта олар Қытайдағы өндірістік алаңдарда орналасқан. Сонымен қатар инвестор ай соңына дейін құрылыс-монтаж жұмыстарына кірісуге дайын екенін растады.

«Қажетті жабдықтардың жартысының сатып алынуы және инвестордың құрылыс-монтаж жұмыстарына кірісуге дайындығы компания ниетінің байыптылығын әрі жобаның жоғары деңгейде пысықталғанын көрсетеді. Біздің облыс үшін бұл өнеркәсіпті дамыту және инвестиция тарту бағытындағы маңызды қадам», — деді облыс әкімінің орынбасары Қанат Дүзелбаев.

Бастаманы іске асырудағы маңызды кезеңдердің бірі — Қазақстан Республикасы Үкіметінің «Ultradecor Trading Kazakhstan» ЖШС-мен инвестициялар туралы келісім бойынша қаулыға қол қоюы. Құжат мемлекет пен инвестор арасындағы ынтымақтастық шарттарын айқындап, жобаны одан әрі табысты ілгерілетуге негіз болады.

Кәсіпорын пайдалануға берілгеннен кейін 180 тұрақты жұмыс орны ашылады. Кешеннің өндірістік қуаты жылына 600 мың текше метр ДСП және 20 млн шаршы метр ЛДСП шығаруға мүмкіндік береді.

Жаңа өндірістің іске қосылуы өңдеу өнеркәсібі өнімдерінің көлемін арттыруға, өңірдің өнеркәсіптік әлеуетін кеңейтуге және Солтүстік Қазақстан облысының инвестициялық тартымдылығын нығайтуға мүмкіндік береді. Кешен елдегі ірі ағаш өңдеу кәсіпорындарының біріне айналып, өңір экономикасының дамуына серпін береді.

Ақпарат көзі : https://www.gov.kz/memleket/entities/sko-sayasat/press/news/details/1245047?lang=ru