Қызметкерлердің денсаулығын сақтау және өндірістегі қауіпсіздікті қамтамасыз ету мақсатында кәсіпорындарда ауысым алдындағы және ауысымнан кейінгі медициналық тексерулер жүргізіледі.
Ауысым алдындағы медициналық тексеру қызметкердің еңбек міндеттерін атқаруға дайындығын анықтауға мүмкіндік береді. Тексеру барысында медицина қызметкері денсаулық жағдайын бағалап, сырқат белгілерін, шамадан тыс шаршауды, сондай-ақ алкогольдік немесе өзге де масаңдық белгілерін анықтайды. Қажет болған жағдайда қызметкер қосымша тексеруге жіберіледі немесе денсаулығы қалыпқа келгенге дейін жұмыстан уақытша шеттетіледі.
Ауысымнан кейінгі медициналық тексеру еңбек қызметі аяқталған соң жүргізіліп, жұмыс жүктемесі мен өндірістік ортаның адам ағзасына әсерін бағалауға мүмкіндік береді. Бұл әсіресе зиянды және қауіпті еңбек жағдайларында жұмыс істейтін қызметкерлер үшін аса маңызды.
Тұрақты түрде жүргізілетін медициналық тексерулер кәсіптік аурулардың алғашқы белгілерін дер кезінде анықтауға, қызметкерлердің денсаулығын бақылауда ұстауға, еңбекке қабілеттілігін сақтауға және өндірістегі жазатайым оқиғалардың алдын алуға ықпал етеді.
Ақмола облысының Санитариялық-эпидемиологиялық бақылау департаменті медициналық тексерулердің басты мақсаты қызметкерлердің денсаулығын қорғау және өндірістегі қауіпсіздікті қамтамасыз ету екенін еске салады.
Ақпарат көзі : https://www.gov.kz/memleket/entities/departament-kkbtu-akmolinsk/press/news/details/1245711?lang=ru
Жауап қалдыру