Павлодар полицейлері қызметтік міндетін атқару кезінде қаза тапқан әріптестерін есімдерімен еске алды

Жыл сайын қалыптасқан дәстүр бойынша ардагерлер мен полиция қызметкерлері қаза тапқан әріптестерінің ерлігі мен батырлығына тағзым етеді. Іс-шара бір минут үнсіздікпен басталып, Мемориалға гүл шоқтарын қою рәсімімен жалғасты.
Салтанатты шараға Павлодар облысының әкімі Асаин Байханов, Департамент басшылығы, ішкі істер органдарының ардагерлері және қаза тапқан қызметкерлердің отбасы мүшелері қатысты. Олардың қатарында Канат Сармантаевтың әкесі де болды. Ол осы уақытқа дейін басшылық тарапынан көрсетіліп келе жатқан қолдау мен қамқорлық үшін алғысын білдірді.
– Қайғылы оқиға осыдан 30 жыл бұрын қылмыскерлерді ұстау кезінде болды. 1996 жылғы 3 маусымда ұлым Канат аға жедел уәкіл Мейрам Даулетовпен бірге қызметтік тапсырманы орындауға шықты. Дзержинский мен Максим Горький көшелерінің қиылысында, «Кристалл» дүкенінің маңында олар іздеуде жүрген қылмыскерге ұқсас адамды байқап, оны ұстауға әрекеттенді. Алайда күдікті кенеттен тапаншасын шығарып, ұлыма және оның әріптесіне жақын қашықтықтан оқ атты. Алған жарақаттарынан Мейрам Даулетов пен Канат Сармантаев оқиға орнында көз жұмды, – деп еске алады қаза тапқан қызметкердің әкесі.
Жиналғандар қаза тапқан әріптестерін бір минут үнсіздікпен еске алды. Құрмет қарауылы ротасы қарудан оқ атып, жеке құрам салтанатты шерумен жүріп өтті.
– Біздің қызметкерлеріміз қызметтік борышын атқару кезінде бейбіт тұрғындардың тыныштығын қорғап, ең қымбат қазынасы – өмірін қиды. Олар: Ахметқали Тезекбаев, Мейрам Даулетов, Канат Сармантаев, Ерлан Нұржанов, Ербол Сембаев, Асылбек Бижанов, Фарид Какабаев және Арли Харки. Бүгін жүрегімізде қайғы болса да, біз олардың жанқиярлығы, батылдығы мен ерлігі үшін мақтанамыз. Олар қылмыскерлердің алдында тайсалмады. Күн сайын қызметке шыққанда, біз оларды есте сақтап, қаралы тізімнің енді ешқашан толығуына жол бермеуіміз керек, – деп атап өтті Павлодар облысы полиция департаментінің бастығы Василий Скляр.
#НашаПолиция #ДеньПолиции2026 #КазахстанскаяПолиция

Ақпарат көзі : https://www.gov.kz/memleket/entities/mvd-pavlodar/press/news/details/1246160?lang=ru